Илимий изертлеў жумыслары

Бердақ атындағы Қарақалпак, мәмлекетлик университети кейинги 22 жылда илимий-изертлеў тараўында айтарлықтай жетискенликлерге еристи. Илимий изертлеўлер жаңа сапалық өзгешеликлерге ийе болды. Университет профессор-оқытыўшыларының алып барған илимий жумыслары ҳәм таярлаған қәнигелери, халық хожалығы, илим ҳәм, билимлендириў тараўларына хызмет етпекте. Өзбекстан Республикасы өз ғәрезсизлигине ерискеннен кейин илимий бағдарда үлкен реформалар алып барылды. Мәмлекетимизде Илим ҳәм техника комитети (ҳәзирги күнде Министрлер Кабинети жанындағы Илим ҳәм технологияларды раўажландырыўды муўапықластырыў комитети), Өзбекстан Республикасы Жоқары Аттестация Комиссиясы дүзилди ҳәм жаңа илимий бағдарларға тийкар салынды.

Университет профессор-оқытыўшылар жәмәәти Өзбекстан Республикасы «Билимлендириў ҳақкында»ғы нызамы ҳәм «Кадрлар таярлаўдың мәмлекетлик миллий бағдарламасын»да көрсетилген ўазыйпаларды әмелге асырыўда, халқымыз келешеги ушын аянбай хызмет етпекте.

Қарақалпақ мәмлекетлик университетинде барлық кафедралар режелестирилген жеке инталы темалар тийкарындағы илимий изертлеў жумысларын алып бармақта. Булардың нәтийжесинде монографиялар, оқыўлықлар, оқыў-методикалық қолланбалар ҳәм илимий мақалалар баспадан шығарылды. Олар тәлим-тәрбия бағдарында ҳәм өндиристе методикалық усыныслар сыпатында әмелий жақтан қолланылмақта.

1991-2013-жыллары даўамында илимий-изертлеў жумыслары нәтийжесинде 29 патент ҳәм гуўалықлар, 161 монография ҳәм брошюралар, 124 оқыўлық, 443 оқыў қолланба, 795 оқыў-методикалық қолланба ҳәм 178 ге жақын илимий әмелий-конференциялар шөлкемлестирилди. 8758 илимий мақала ҳәм тезислер баспадан шығарылды.

Ғәрезсизликтиң 22 жылы ишинде Қарақалпақ мәмлекетлик университетинде мәмлекетлик бюджет тәрепинен қаржыландырылған илимий жойбарлар тийкарында 115 998,3 мың рубль ҳәм 1 074 258 мың сумлық қаржы қөлеминдеги илимий-изертлеўлер орынланды.

Кафедраларда хожалық шәртнамалары тийкарында илимий-изертлеў жумыслары ҳәр қыйлы кәрханалар ҳәм шөлкемлер менен биргеликте 100 ден аслам хожалық шәртнамалары орынланды. Оларға 7 млн. 603 мың рубль ҳәм 68 млн. 653 мың сўм муғдарында хожалық шәртнамалары бойынша илимий изертлеў жумыслары алып барылды.

Университет кафедраларында халықаралық байланысларды кеңейтилген ҳәм тәлим тараўына шет ел инвестицияларды алып келиў барысында шет ел грантлары тийкарында илимий ислер әмелге асырылды. Мәселен, Евразия фонды, Сорос фонды, ЮНЕСКО, НАТО, JICA шөлкеми ҳәм INTAS бағдарламалары тийкарында 1991-2013-жыллары 96 мың 298 АҚШ доллары ҳәм 26 мың 666 экю көлеминдеги грантлар тийкарында илимий жумыслар орынланды.

Университет ҳәм кафедралар шөлкемлестириўинде илимий-изертлеў жумыслары нәтийжелерин анализлеп барыў ушын профессор- оқытыўшылардың қатнасыўында республикалық ҳәм университет көлеминде илимий конференциялар өткерилмекте. 1991-2013-жыллар ишинде республикалық көлемде ҳәм университитет көлеминде 1499 илимий конференциялар өткерилди.