TuCAHEA жойбарының Нөкистеги ушырасыўы

 Европа Аўқамының Темпус бағдарламасы Өзбекстанда 1994-жылдан бери нәтийжели жумыс алып бармақта. Бул бағдарламаның мәқсети – жоқары билимлендириўди

.

заманагөйлестириўден ибарат. Ҳәзирги ўақытта Қарақалпақстандағы жоқары оқыў орынлары да усы бағдарлама тәрепинен шөлкемлестирилип атырған таңлаўларда қатнасып, грант жеңимпазына айланбақта. 

Қарақалпақ мәмлекетлик университетинде Темпус бағдарламасының TuCAHEA (Towardsa Central Asian Higher Education Area: Tuning Structures and Building Quality Culture – Орайлық Азия жоқары билимлендириў кеңислигин пайда етиўде структуралық адаптация ҳәм билим сыпатын арттырыў) жойбарының гезектеги мәмлекет көлеминдеги ушырасыўы болып өтти. Онда усы жойбарда қатнасып атырған Өзбекстан жоқары оқыў орынлары қатнасты. Негизинде булл жойбарда Орайлық Азия еллеринен ҳәм Европа Аўқамы еллериниң көплеген жоқары оқыў орынлары бирге ислеседи. Жойбардың мәқсети билимлендириў орынларында Европаның алдынғы оқытыў системасына бағдарлаў болып табылады. Яғный, студентти оқытыў емес, ал студенттиң оқыўын тәмийнлеў арқалы раўажланыўға үлес қосыў болып табылады. 

 Нөкисте өткерилген төртинши ушырасыўға Италияның Пиза университети профессоры, усы жойбардың координаторы Катерин Исаакс ҳәм Өзбекстанның бир қанша жоқары оқыў орынларынан да ўәкиллер келди. Ушырасыўға Қарақалпақстанда ҳәрекет етип турған жоқары оқыў орынлары оқытыўшылары, студентлери ҳәм илимий хызметкерлери қатнасты.

 Ушырасыўды университеттиң оқыў ислери бойынша проректоры, доцент Мухтар Ибрагимов кирис сөз бенен ашты. Ол өз сөзинде Қарақалпақ мәмлекетлик университетинде ҳәзирги ўақытта алты Темпус жойбарының ҳәрекет етип атырғанын ҳәм олардың жоқары билимлендириў системасын заманагөйлестириядеги ролине айрықша тоқтады.

 Буннан соң Италияның Пиза университетинен келген мийман, жойбар координаторы Катерин Исаакс жойбар юойынша арнаўлы презентация исследи. Ол жыйналғанларға жойбардың мәқсет ҳәм ўазыйпаларын түсиндириди. Исленип атырған жумыслар ҳәм олардың нәтийжелери бойынша мағлыўматлар берди. Болония эксперти сыпатында Европа Аўқамының Erasmus+ бағдарламасы ҳаққында да түсиндирди.

  Еки күни даўам еткен бул ушырасыўда TuCAHEAжойбарының өзбекстанлы қатнасыўшылары Дилшадбек Нурматов, Дилафруз Гиясова, Элзара Жузикова, Нурулло Умарханов, Полатхан Лутфуллаев, Қарлығаш Умаровалар өзлериниң жоқары оқыў орынларында жойбар шеңберинде исленип атырған жумыслар ҳаққында, олардың нәтийжелери туўралы есап берди. Алда турған ўазыйпалар жөнинде мәсләҳәтлесип алды. Ушырасыўдың екинши күнинде жойбар шеңберинде студентлердиң билим алмасыўы ҳәм олардың оқыған дәўириндеги алған баҳалаў системаларының тән алыныўы мәселелери додаланды.

Б.Палуанов. ҚМУ дың журналистика кафедрасының доценти