Differenciallıq teńlemeler kafedrası

Qaraqalpaqstanda matematikanıń áhmiyetli tarawlarınıń biri bolǵan differenciallıq teńlemeler hám matematikalıq fizika boyınsha dáslepki ilimiy izertlewler ótken ásirdiń 40-jıllarınıń aqırında úlkemizde joqarı matematikalıq bilimlendiriwdi shólkemlestiriwshilerdiń biri bolǵan ustazımız Omar Buleshevtıń jumısları menen baslandı. Onıń ilimiy izertlewleri dara tuwındılı differenciallıq teńlemeler teoriyasına baǵıshlandı. 1954-jılı Ózbekstan Ilimler Akademiyasınıń  Matematika institutınıń Ilimiy keńesinde «Birinshi hám ekinshi tártipli dara tuwındılı differenciallıq teńlemeler teoriyasına sırtqı Kartan formalarınıń qollanılıwı» temasında kandidatlıq dissertaciyanı tabıslı qorǵap shıqtı hám matematika boyınsha Qaraqalpaqstandaǵı birinshi ilim kandidatı boldı.

          Pedagogikalıq institut bazasında Nókis mámleketlik universiteti ashılǵannan keyin differenciallıq teńlemeler teoriyası hám matematikalıq fizikanıń hár qıylı aktual máseleleri boyınsha ilimiy-izertlew jumısları alıp barıldı hám búgingi kúnde de bul jumıslar dawam etpekte.

          Differenciallıq teńlemeler boyınsha qánige oqıtıwshılar dáslep universitettiń matematikalıq analiz kafedrasında jumıs isledi. 1991-jılı usı kafedra bazasında jańadan «Differenciallıq teńlemeler» kafedrası shólkemlestirilip, oǵan 1995-jılǵa shekem docent F. N. Japakova basshılıq etti. 1997-jılı kafedralardı irilendiriwge baylanıslı kafedra qaytadan matematikalıq analiz kafedrasına qosıldı. 2000-jıldıń sentyabr ayınan baslap, differenciallıq teńlemeler hám matematikalıq fizika pánleri «Algeba hám geometriya» kafedrasına qosılıp, «Algebra hám differenciallıq teńlemeler» kafedrası bolıp qayta dúzildi. Al, 2015-jıldıń 2-sentyabrinen baslap onıń differenciallıq teńlemeler bólegi qaytadan «Matematikalıq analiz» kafedrasına ótkerildi. 2019-jıl sentyabrde universitettiń jańa strukturasına muwapıq, «Differenciallıq teńlemeler» kafedrası qayta ashıldı. Házir kafedranı docent Q. Q. Elǵondiev basqarıp atır.

Kafedra universitetimizdiń kóp tálim baǵdarları boyınsha bakalavrlar tayarlawǵa, sonıń menen birge, «Differenciallıq teńlemeler hám matematikalıq fizika» qánigeligi boyınsha magistrler tayarlawǵa belsendi túrde qatnaspaqta. Kafedra aǵzaları tálim-tárbiya jumısları menen birge ilimiy-izertlew jumısların da alıp barmaqta.

Házirgi kúnde kafedrada 10 professor-oqıtıwshı islep atır. Olardan 6 professor-oqıtıwshı docent hám ilim kandidatları.

Kafedrada Mırza Ulıǵbek atındaǵı Ózbekstan milliy universiteti, Tashkent mámleketlik pedagogikalıq universiteti, V.I. Romanovskiy atındaǵı matematika institutı, Al-Xorezmiy atındaǵı Úrgench mámleketlik universiteti, Ukraina Milliy Ilimler Akademiyasınıń matematika institutı, Kiev milliy universiteti, Belarus Milliy Ilimler Akademiyasınıń matematika institutınıń sáykes kafedraları hám bólimleri menen ilimiy baylanıslarǵa iye.

Kafedra         oqıtıwshılarınıń       belsene         qatnasıwında           2004-2008-jıllarda «Differenciallıq teńleme hám onıń qollanılıwı» temasında respublikalıq ilimiy konferenciyalar bolıp ótti. Sonday-aq, 2009-jılı ótkerilgen «Funkcionallıq analizdiń zamanagóy mashqalaları», 2011-jılı ótkerilgen «Matematikanıń zamanagóy mashqalaları», al 2012-jılı universitetimizde «Komplekslik hám funkcionallıq analizdiń zamanagóy mashqalaları» atamasındaǵı Respublikalıq ilimiy konferenciyalarǵa kafedra oqıtıwshıları belsene qatnastı.

Kafedrada islep atırǵan ilimiy dárejeli professor-oqıtıwshılar

	Elgondiev Quanısh Qalbaevich Fizika-matematika ilimleriniń kandidatı, dotsent. 1961-jılı 5-fevral kúni Xojeli rayonında tuwılǵan. 1984-jılı Berdaq atındaǵı Qaraqalpaq mámleketlik universitetin tabıslı tamamlaǵan. Qánigeligi matematik, oqıtıwshı. 1989-jılı 21-oktabr kúni «Асимптотическое интегрирование квазилинейных уравнений второго порядка с импульсным воздействием» temasında kandidatlıq dissertaciyasın múddetinen aldın jaqladı. 50 den aslam ilimiy jumısları baspada járiyalanǵan. Sonıń ishinde 11 oqıw-metodikalıq qollanbaları baspadan shıqqan. 1990-jıldan baslap matematikalıq analiz kafedrasında islep atır. 1995-jılı dotsent ilimiy ataǵın alǵan, Qaraqalpaqstan Respublikası xalıq bilimlendiriw aǵlası. 2016-2019-jılları matematikalıq analiz kafedrasınıń baslıǵı lawazımında islegen. 2019-jıldan baslap differenciallıq teńlemeler kafedrası baslıǵı lawazımında tabıslı islep kelmekte.
	Nurjanov Orınbay Dalibaevich Fizika-matematika ilimlerinin kandidatı, docent. 1950-jılı 10-oktabrde Kegeyli rayonında tuwılǵan. 1971-jılı Qaraqalpaq mámleketlik pedagogikalıq institutın tamamlaǵan. 1971-1973-jılları T.Shevchenko atındaǵı Kiev milliy universitetinde stajirovkadan ótken, al 1974-1977-jılları sol universitettiń aspiranturasında oqıǵan. 1979-jılı Kiev universitetinde «Аналитические методы построения периодических решений интегро-дифференциальных уравнений типа Вольтерра» temasında kandidatlıq dissertaciyasın jaqladı. 50 den aslam ilimiy maqala hám tezisleri basılıp shıqtı. Sonıń menen birge, 20 atamadaǵı ilimiy-metodikalıq jumısları baspada járiyalandı. 1990-1993-jılları matematika fakultetiniń dekanı bolıp isledi. 2010-2011-jılalrı algebra hám differenciallıq teńlemeler kafedrasınıń baslıǵı lawazımında islegen. Házir kafedrada docent lawazımında islep atır.
	Omarov Allambergen Fizika-matematika ilimlerinin kandidatı, docent. 1945-jılı 10-dekabrde Shomanay rayonında tuwılǵan. 1970-jılı Qaraqalpaq mámleketlik pedagogikalıq institutın tamamlaǵan. 1972-jılǵa shekem instituttıń fizika-matematika fakultetinde assistent bolıp islegen. 1972-1974-jıllarda Kiev universitetiniń stajer-izertlewshisi bolǵan. 1974-1977-jıllar aralıǵında Kiev universitetinde aspiranturasında oqıǵan. 1977-1986-jıllar aralıǵında Ózbekstan Ilimler Akademiyasınıń Qaraqalpaqstan filialında ilimiy xızmetker bolıp islegen. 1986-jılı Kiev universitetinde «Решение начало-краевых задач теплопроводности в конусе, усеченном сферами» temasında kandidatlıq dissertaciya jumısın jaqlaǵan. Házir kafedrada docent lawazımında islep atır.
	Qurbanbaev Ótebay Orınbaevich Fizika-matematika ilimlerinin kandidatı, docent. 1958-jılı 15-martta Qaraózek rayonında tuwılǵan. 1982-jılı Qaraqalpaq mámleketlik universitetin tamamlaǵan. 1985-1987-jılları T.Shevchenko atındaǵı Kiev milliy universitetinde stajirovkadan ótken, al 1987-1990-jılları usı universitettiń aspiranturasında oqıǵan. 1990-jılı Kiev universitetinde 01.01.02-Differensiallıq teńlemeler hám matematikalık fizika qánigeligi boyınsha «Краевые задачи для дифференциальных уравнений с импульсными воздействиями» degen temada kandidatlıq dissertaciya jaqlaǵan. 40 tan aslam ilimiy maqalaları hám tezisleri basılıp shıqtı. Sonıń menen birge, 6 atamadaǵı ilimiy-metodikalıq jumısları baspada járiyalandı. Házirgi waqıtta differenciallıq teńlemeler kafedrası dotsenti lawazımında islep atır.
	Tanirbergenov Muratbek Bazarbaevich Fizika-matematika ilimleriniń kandidatı, docent. 1973-jılı 6-may kúni Nókis qalasında tuwılǵan. 1995-jılı Qaraqalpaq mámleketlik universitetin tamamlaǵan. Qánigeligi differenciallıq hám matematikalıq fizika teńlemeleri. 2007-jılı 7-may kúni «Некоторые вопросы теории обратных задач оператора Дирака на всей прямой» temasında kandidatlıq dissertaciyasın jaqladı. 15 ten aslam ilimiy miynetleri baspada járiyalandı. Sonıń ishinde 4 oqıw qollanbası baspadan shıqtı. Házirgi waqıtta differenciallıq teńlemeler kafedrası docenti lawazımında islep atır.
	Otarova Jamila Amanbaevna Fizika-matematika ilimlerinin kandidatı, docent. 1979-jılı 24-sentabrde Nókis qalasında tuwılǵan. 2000-jılı Qaraqalpaq mámleketlik universitetiniń bakalavr tálim baǵdarın, al 2002-jılı differenciallıq teńlemeler qánigeligin pitkergen. 2002-2004-jılları Algebra hám differenciallıq teńlemeler kafedrasında assistent lawazımında isledi. 2004-2005-jılları Ózbekstan Milliy universitetinde stajirovkadan ótip, 2005-2008-jılları aspiranturada oqıdı. 2009-jılı «Разрешимость и спектральные свойства краевых задач для уравнения смешанного типа 4-го порядка» degen temada kandidatlıq dissertaciyasın qorǵadı. 20 dan aslam ilimiy maqala hám tezisleri basılıp shıqqan. Házir kafedrada docent lawazımında islep atır.