ҚМУда байрам илажлары

Еслеў — бул бизиң уллы ата-баба­ларымызға, дүньядан өткен ата-аналарымызға айрықша ҳүрмет көрсетиў болса, Қәдирлеў — бул өткенлер менен бир қатарда бүгинги күни өзиниң ибратлы өмир жолы менен үлги болып киятырған жасы үлкенлерди ардақлаў болып табылады.

Себеби, екинши жер жүзилик урыстың аянышлы ақыбетинен жәбир көрмеген бир де  шаңарақ жоқ, десек асыра айтқан болмаймыз. Елимиз басына күн туўғанда 1,5  миллионнан аслам жерлеслеримиз урысқа атланған болса, соннан 500 мыңы сол қанлы саўашларда қурбан болды. Көпшилиги аўыр жарақатланып, ма­йып болып қайтты. Буннан тысқары халқымыз тек саўаш майданларында ғана емес, ал, тылда да күни-түни мийнет етип, жаўынгерлеримизди зәрүр буйымлар, кийим-кеншек, азық-аўқат өнимлери менен үзликсиз тәмийинлеп турды. Соның менен бирге, урыс жүрип атырған аймақлардан елимизге көширилген мыңлаған шаңарақ ҳәм балаларға үйиниң төрин берди. Бир тислем нанға шекем бөлисип жеди.

9-май – «Еслеў ҳәм қәдирлеў күни», сондай-ақ, Екинши жер жүзилик урыста фашизм үстинен ерисилген жеңистиң 74 жыллығы байрам илажлары республикамыз бойлап даўам етпекте.

Бүгин ерте таңнан баслап Бердақ атындағы Қарақалпақ мәмлекетлик университети алдында Нөкис қаласында жайласқан Арқа-Батыс әскерий округиниң әскерий оркестри ҳәм университеттиң талантлы студент-жаслары тәрепинен урыс жылларының қосық ҳәм намалары атқарылды.

Илажға ҚМУ ректоры А.Реймов, университет профессор-оқытыўшылар, студент-жаслар ҳәм кең жәмийетшилик ўәкиллери  қатнасты.

Ҳақыйқатында да, бүгинги ашық аспан ҳәм парахат турмыстың қәдир-қымбатын билип жасаў, оны көздиң қарашығындай сақлаў ҳәр бир пуқараның, соның ишинде жасларымыздың әдиўли миннети болыўы зәрүр.

Баспасөз хызмети.