Ata-analardın’ huqıq ha’m de ma’jbu’riyatları, ata-analardın’ perzent ta’rbiyasındag’ı huqıqıy bilimleri. O’zbekstan Respublikası Bas Ministrinin’ orınbasarı ta’repinen tastıyqlang’an «2019-jıl 15-may – Xalıqaralıq shan’araq ku’ni»n respublikanın’ barlıq aymaqlarında ken’ belgilew, shan’araqlar bekkemligin ta’miyinlew, shan’araqlarda ruwxıy ta’rbiyalıq qa’diriyatlardı sin’diriw, ja’miyette tınıshlıq ha’m tatıwlıqtı saqlawda shan’araqtın’ tutqan ornın u’git-na’siyatlaw boyınsha Kompleks is-ilajlar reje”sinde belgilep berilgen gezektegi is-ilajlardin’ biri usı atamada 2019-jıl 7-may ku’ni Shet tiller fakultetinde bolıp o’tti. Ilajg’a student-jaslardın’ o’zleri ha’m olardın’ ata-anaları menen bir qatarda universitettin’ Jaslar menen birge islesiw boyınsha prorektori A.Du’ysenbaev, universitet Hayal-qızlar komiteti baslang’ısh sho’lkemi baslıg’ı I.Seytnazarova, universitet Shan’araq orayınan, Shet tilleri fakulteti dekanı Dj.Qurbanbaev, fakultet hayal-qızlar sho’lkemi baslıg’ı M.Ametova, fakultettin’ Jaslar menen islesiw boyınsha dekan orınbasarı T.Kulniyazov ha’m jası u’lken ustazlar, topar basshılar qatnastı.

Fakultettin’ 1-kurs studentlerinin’ ata-anaların o’z ishine qamtıg’an bul sa’wbetlesiw ha’m soraw-juwap keshesin fakultet dekanı kiris so’zi menen aship berdi. Bunnan son’ No’kis qalalıq PHAJ bo’limi baslıg’ı S.Pirnazarova ha’m fakultet hayal- qızlar ken’esi baslıg’ı M.Ametovalar so’zge shıg’ıp, elimizde shan’araqlar bekkemligin ta’miyinlew, ajırımlardın’ sanın kemeytiw, nekesiz shan’araq qurıwdın’ aldın alıw boyınsha joybarlar haqqında ata-analarg’a mag’lıwmatlar berdi.

Haqiyqatinda da, ta’lim menen ta’rbiya ten’dey alıp barılg’an ma’mlekette ha’m ruwxıy ha’m materiallıq jaqtan rawajlanıw bolıwı turg’an ga’p. Al, bu’gingidey ustazlar menen ata-analardın’ birgelikte bir jag’adan bas, bir jen’nen qol shıg’arıp birge islesiwleri ja’miyetimizdin’ alg’a ilgerlewine u’lken ja’rdem tiygiziwine isenemiz.

E.Biysenbaeva,

Shet tilleri fakul’tetinin’ 2-kurs studenti.