Kitapqumarlıq mádeniyatın arttırıw maqsetinde

Prezidentimizdiń kitapqumarlıq mádeniyatın joqarılatıwǵa qaratılǵan nızam hám pármanlarınıń, sonday-aq, bes áhmiyetli baslamanıń orınlanıwın támiyinlew maqsetinde I.Yusupov atındaǵı qánigelestirilgen mektep-internatında kitapqumarlıq hápteligi ótkerildi.

Bul háptelikte mekteptiń 8, 9-klass oqıwshıları, ámeliyatshılar Allambergenov Islam, Amanova Ulbosın, Qosımbetova Aygúl, Kárimbaeva Ulmeken, Qarasaev Ázizbek hám Ubayxanova Miywagúller qatnastı. Hápteliktiń birinshi basqıshı 9-klass oqıwshıları arasında I.Yusupovtıń ómiri hám dóretiwshiligin úyreniw boyınsha onıń “Dala ármanları”, “Aktrisanıń ıǵbalı”, “Gilemshi hayal haqqında haqıyqatlıq ” shıǵarmaları tiykarında ótkerildi. Jarısta 9-a hám 9-b klass oqıwshılarınıń bilimleri usı shıǵarmalar tiykarında ámeliyatshılardıń tayarlap kelgen sorawları, súwretli tapsırmaları hám sóz jasırıw sıyaqlı shártleri tiykarında bahalandı. Jarıs juwmaǵında eki klastıń toplaǵan balları teńdey bolıp, doslıq jeńimpaz boldı.

 Ekinshi basqıshta mekteptiń 8-klass oqıwshıları arasında qaraqalpaq ádebiyatnıń klassik shayırları Ájiniyaz hám Berdaq shayırdıń ómiri hám dóretiwshiligin tereńirek úyreniw maqsetinde ádebiy keshe hám ashıq sabaq usılında ótkerildi. Bunda ámeliyatshılar klassik shayırlarımız ómiri hám dóretiwshiligi boyınsha oqıwshılarǵa prezentaciya islep berdi. Keyin oqıwshılar eki toparǵa bólingen halda shayırlardıń qosıqların aytıp, ómiri hám dóretiwshiliginen saxnalıq kórinisler  kórsetti.

Kitapqumarlıq hápteligin shólkemlestiriw hám ótkeriwde  tájiriybeli oqıtıwshılardan Tórebaeva Gúlzar, Xojalepesova Gúlistan hám Ataniyazova Gúlshadlar ámeliyatshı studentlerge basshılıq etti, olarǵa jol-joba kórsetip bardı. Ótkerilgen háptelikte oqıwshılar menen birgelikte ámeliyatshılar da bilimlerin jáne bir ret ámeliyatta sınnan ótkerdi.

Juwmaqlap aytqanda, bunday jarıslardıń tez-tezden shólkemlestiriliwi jas áwladtıń kitapqumarlıq mádeniyatınıń hám bilim dárejesiniń artıwına, shayırlarımız miyrasların ele de tereńirek úyreniwge hám uzaq jıllar dawamında saqlanıp qalıwına tiykar bola aladı.

Turdıbek Naurızbaev,

Qaraqalpaq filologiyası hám jurnalistika fakulteti studenti.