Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида “Ўзбекистонда короновирус инфекциясининг тарқалиши ва унга қарши кўрилаётган чоралар бўйича таълим муассасаларида амалга оширилаётган ишлар” мавзусида онлайн режимдаги брифинг ўтказилди.

Тадбирда Олий ва ўрта махсус таълим вазири Ином Маджидов, Халқ таълим вазири Шерзод Шерматов, Ўзбекистон Республикаси Вазирлар Маҳкамаси ҳузуридаги Давлат санитария-эпидемиология назорати инспекцияси бошлиғи Нурмат Отабеков ва Санитария-эпидимиологик осойишталик агентлиги директори-Ўзбекистон бош давлат санитария врачи Бахром Алматов ҳамда тегишли мутасаддилар томонидан журналистларнинг саволларига жавоб берилди.

– Талабалар учун таътил эълон қилинди ва шу тартиб асосида улар ўз яшаш манзилларига жўнаб кетишди. Карантин ҳолатида ҳаммани бир жойда сақлаб туриш имконсиз. Биз Транспорт вазирлиги билан талабаларнинг ўз уйларига етиб олишлари учун шароит яратиб бердик. Бугунги ҳолат бўйича уларнинг асосий қисми ўз вилоятларига кузатиб бўлинди, – деди И.Маджидов.

Вазир карантин вақтида талабаларнинг контракт тўловлари муддатининг узайтирилиши бўйича саволга жавоб қайтараркан шундай деди:

– Контракт тўловлари муддатини узайтиришга эҳтиёж йўқ. Агар қандайдир ўзгариш бўлса, бу амалга оширилади.

Шунингдек, брифингда олий таълим муассасалари каби коллежларда ҳам худди олий таълим муассасаларидаги каби қолдирилган дарслар ёзги таътил ҳисобидан қопланиши таъкидланди.

Манба: http://edu.uz