Universitettin’ Ma’limleme-resurs orayinin’ kitap fondi universitet professop-oqitiwshilari ta’repinen do’retilip atirg’an monografiyalar, sabaqliqlar, oqiw qollanbalar, oqiw metodikaliq qollanbalar menen bayitilmaqta.

Jaqinda «Miraziz Nukus» JSHJ baspasi ta’repinen B.Abdikamalov, M.Tagaev, R.Xojanazarovalardin’ avtorlig’inda «Fizika iliminin’ tariyxi menen xronologiyasi» kitabi baspadan shiqti.

Oqiw-metodikaliq qollanbada fizika iliminin’ en’ a’yyemgi da’wirlerden baslap ha’zirgi ku’nlerge shekemgi tariyxi menen xronologiyasin o’zinin’ ishine aladi.

Qollanbada a’lemge ha’m ta’biyatda bolg’an ko’z-qaraslardin’ evolyuciyasi, fizikaliq nizamliqlardin’, teoriyalardin’ ha’m prinsiplerdin’ ashiliwinin’ izbe-izlikleri menen nizamliqlari orin alg’an. Onda keltirilgen xronologiya a’yyemgi da’wirlerden baslap ha’zirgi ku’nlerge shekemgi fizikaliq ashiliwlardi, baqlawlardi o’zinin’ ishine aladi.

Keltirilgen mag’liwmatlardi toliqtiriw maqsetinde fizika ilimi boyinsha Nobel siylig’in alg’an laureatlar haqqinda, siyliq aliwg’a tiykar bolg’an mag’liwmatlar qaraqalpaq ha’m ingliz tilinde berilgen.

Kitap avtori, professor B.Abdikamalov ta’repinen universitet Ma’limleme-resurs orayina 10 danasi sawg’a retinde berildi.

Biz de kitap avtorlarina o’z minnetdarshilig’imizdi bildirip, olardin’ ilimiy-do’retiwshilik jumislarinda tabislar tilep qalamiz.

Zuxra Imalatdinova,

Ma’limleme-resurs orayi qa’nigesi.