Быйылғы оқыў жылында Бердақ атындағы Қарақалпақ мәмлекетлик университетиниң магистратурасын 24 қәнигелик бойынша 123 магистрантлар питкерип шықпақта. Қуўанышлы тәрепи сонда олар арасында «Зульфия» атындағы мәмлекетлик сыйлықтың лауреатлары менен бирге ҳәр қыйлы мәмлекетлик стипендиялардың жеңимпазлары бар.
Шымбай районында туўылып камалға келген Дильфуза Ешниязова кишкенелигинен математика ҳәм инглис тили пәнине ықласлы болып, 43-санлы мектепте дәслепки устазлары Тәжибаева Шийрин, Гүлшад Баўенова,Бийбихан Рамбергенова, Сарыгүл Халмуратовалар, Шымбай академиялық лицейинде болса Ақсулыў Нурлыбаевалардан жалықпастан тәлим алды.
2014-2018-жыллары университеттиң бакалавр тәлим бағдарында оқыған жыллары устазлары физика-математика илимлериниң докторы, профессор Кәримберген Қудайбергенов, физика-математика илимлериниң кандидаты, доцент Айназар Дәўжановлардан математика илиминиң әлўан түрли сырларын үйренди. 2018-жылы магистратураға оқыўға түсип, илмий басшысы физика-математика илимлериниң кандидаты Жумабек Сейпуллаев пенен Some geometric properties of neutral SFS-spaces- Көпкеңисликлердиң базыбир геометриялық қәсийетлери деген темада илмий изленислер алып барып, 30-июнь күни Жаслар күни байрамында илмий жумысын инглис тилинде табыслы қорғап шықты.
Бизлерде өз гезегинде бул излениўшең магистрантты ҳәм оның устазларын 30-июнь-Жаслар күни байрамы ҳәм ерискен табыслары менен қызғын қутлықлап, алдағы жумысларында табыслар тилеймиз.

Шахноза Оразымбетова.
Сүўретте: магистрант Дилфуза Ешниязова.