ÁSIRLERGE GUWA MOYNAQ

 

Tariyx, kórkem-óner hám mádeniyat jasasa,

millet hám xalıq, pútkil insaniyat erkin jasaydı.

Sh.Mirziyoev

Moynaq rayonındaǵı Sulayman Baqırǵani memorial kompleksinde 2021-jıl may ayınıń  10-sánesinen baslap qánigelik arxeologiyalıq-etnografiyalıq ámeliyat ótkermektemiz. Ámeliyatımızǵa arxeologiya kafedrasi basliǵi, docent, t.i.k J.Hakimniyazov, t.i.k., docent. M.Turebekov, ulken oqitiwshi S.Saypov, assistent oqitiwshi M.Tolibaevlar basshiliq etpekte.

Ázel-ázelden Moynaq rayonı aymaǵında tariyxtı sáwlelendiriwshi tariyxıy obektler bar ekenligi bárshemizge málim.

Usı jıldıń ustazlarımızdıń basshılıǵında 14-may kúni arxeologiya tálim baǵdarı 2-kurs studentleri menen birgelikte Moynaq rayonında jaylasqan bir qatar tariyxıy mádeniy orınlarǵa sayaxat shólkemlestirildi. Bul rayonǵa sayaxatımızdı áweli «Ájiniyaz baba maxbarası»n ziyaratlaw menen basladıq.

Álbette, bul jerde ózara mádeniy sawda hám diplomatiyalıq baylanıslar orayı bolǵanlıǵın biz bul jer xalqınıń mádeniyatı, úrp-ádet dástúrleri hám belgili tariyxıy orınlarınan biri bolǵan Úshsay portı sıyaqlı tariyxıy orınlarınan biliwimizge boladı.

Kóp jıllar dawamında mádeniy baylanıslar orayı sıpatında xızmet etip kelgen. Moynaq rayonınındaǵı oraylıq kósheniń eki boyında boy tiklegen záwlim imaratlar, mısalı «Aq keme» balalar dem alıw orayı, aeroport,  rayon orayındaǵı sawlatlı meshit, «Muynak Times» hám sol sıyaqlı zamanagóy imaratlar boy tiklep qala kórkine kórk baǵıshlap tur.

Sayaxat dawamında Úshsay portındaǵı «Kemeler qábiristanı»na, Aral teńizi tariyxı muzeyine hám de sol jerdegi dıqqatqa ılayıqlı mádeniy miyras obektlerine bardıq. Muzeydegi tariyxıy eksponatlar menen jaqınnan tanısıp, Aral teńiziniń ótmishi hám búgini haqqında keńnen maǵlıwmatlarǵa iye boldıq. Muzeyde Orta Aziya territoriyasında (Aral teńizi jaǵasında) jasaǵan quslar, haywanatlar hám balıqlardıń bir neshe túrleri orın alǵan. Ol jerdegi eksponatlar bizlerdi júdá tásirlendirdi.

Bul mádeniy dem alıs dawamında studentler ózlerine bir qansha ruwxıy azıq aldı hám Moynaq rayonı hám onda jaylasqan tariyxıy orınlar haqqında kerekli maǵlıwmatlarǵa iye boldı.

Bunday sayaxatlar jaslardıń sanasında Watanǵa bolǵan súyishpenshiligin asırıwda, ata-babalar miyrasın asırıp abaylap, keyingi áwladqa jetkeriwde unamlı tásirin tiygizedi. Sebebi ótmish tariyxı biz ushın ómir mektebi, misli bir tınıq ayna. Jolımızdı jarqın hám parawan etiwde úlken áhmiyetke iye. Ótmishten ibrat alıp jasaw, onnan tuwrı juwmaq shıǵarıw hár birimizdiń ádiwli minnetimiz esaplanadı. Demek solay eken, búgingi kúndegi iygilikli isler bizlerdiń aydın ullı keleshigimizge tiykar jaratadı. Hár birimiz bay tariyxımız benen maqtanısh sezimleri menen jasar ekenbiz, nesip etse ullı keleshegimizde boladı.      

 

 

R.TLEMISOV., T. SARSENBAEV

Arxeologiya talim bagdari 2-kurs studentleri

Пайдалы дереклер

Skip to content