Usı jıldıń 24-noyabr kúni Bank-finans akademiyası binasında StartUp akseleraciya baǵdarlaması konferenciyası bolıp ótti. Konferenciyaǵa universitettiń Matematika fakulteti, 2-kurs Kompyuter ilimleri hám programmalastırıw texnologiyaları tálim baǵdarında bilim alıp atırǵan hám IT tarawına qızıǵıwshılıǵı bolǵan student-jaslar qatnastı.
Konferenciyanıń tiykarǵı maqseti sanlı texnologiyalarǵa qızıǵıwshılardıń auditoriyasın kóbeytiw, IT tarawındaǵı jetik qánigelerdi tańlap alıw hám usı arqalı bul tarawdı ele de rawajlandırıw. IT tarawın úyreniw tek ǵana biziń mámleketimizde emes, bálkim, pútkil dúnyada búgingi kúnde ayrıqsha hám áhmiyetli bolǵan wazıypaǵa aylanǵan.
Hár qanday StartUp joybardıń tiykarında – insan tárepinen payda bolǵan ideya jatadı. Akseleraciya baǵdarlamasınıń tiykarǵı baslaması – sizde bar bolǵan ideya protatipin qánigeler komandası menen jıynalıp, siziń aldıńızǵa qoyǵan maqsetlerińizge jetiwińiz ushın qarjılandırıw hám joybardı haqıyqıy bizneske aylandırıwǵa tiykarlanǵan.
Baǵdarlama siziń StartUp joybarlarıńızdı aktiv rawajlandırıwǵa ózgeshe baǵdarda jantasıwdı tániyinleydi, tek ǵana mentorlardan emes, taraw qánigelerinen tájiriybe alıwdı hám qosımshasına ónimdi intelektual múlk retinde trásmiylestiriw, yuridikalıq másláhát alıw, investiciyalastırıw orayına kiriw, marketing járdemin alıw hám keń sheriklik tarmaǵın rawajlandırıwda járdemlesedi.
Bunnan tısqarı usı jıldıń 20-22-noyabr kúnleri aralıǵında Tashkent qalasında ótkerilgen Hakaton haqqında da maǵlıwmat berildi. Hakatonda turmıstıń hár bir tarawı boyınsha óz ideyaları menen jámi 23 komanda qatnasqan. Jeńimpazlar smartfon, bahalı sıylıqlar hám estelik sawǵaları menen sıylıqlanǵan. Baǵdarlama qatnasıwshılarınıń eń kishi toparı 4-klass oqıwshıları bolıp, Youth Developer nominaciyası boyınsha smartfonlar sawǵa etilgen.
Konferenciya juwmaǵında student-jaslar tárepinen qızıqtırǵan sorawlarǵa juwaplar berildi.
Matematika fakulteti
Algoritmlestiriw hám programmalastırıw
texnologiyaları kafedrası stajyor-oqıtıwshısı
Ollamberganov Fayzulla
