Jaslardıń bos waqıtların mazmunlı ótkeriw hám kitapqumarlıqqa qızıqtırıw maqsetinde prezidentimiz Shavkat Mirziyoevtıń basshılıǵında ámelge asırılıp atırǵan áhmiyetli 5 baslamanıń 4-baǵdarı boyınsha elimiz boylap bir qansha jumıslar islenip atır. Jaqında Taqıyatas rayonlıq XBBne qaraslı 4- 6-mekteptiń oqıwshıları hám úgit-násiyatlawshı pedagogları Qayıpnazarova Móldir hám Qoylıbaeva Húrlimanlar universitetimizdiń «Kitapqumarlar klubı»nda miymanda boldı.
Ushırasıwda Málimleme-resurs orayı direktorı Naǵıyma Sharigatova, «Kitapqumarlar» klubı baslıǵı Rawshan Qalmurzaeva hám klub aǵzaları shıǵıp sóyledi. Oqıwshılar Málimleme-resurs orayında jaratılǵan shárt-sháráyatlar, kitap fondı, oqıw zalları menen tanısıp shıqtı. Klub aǵzaları tárepinen tayarlanǵan kórkem oqıwlar, kitap prezentaciyaları, motivaciyalıq treningler oqıwshılarda ózgeshe tásir qaldırdı. Málimleme-resurs orayı hám universitet boylap sayaxat dawamında oqıwshılar ózlerin qızıqtırǵan sorawlarǵa juwaplar aldı.
Juwmaqlap aytqanda, jaslar arasında kitapqumarlıqtı en jaydırıw barısında bunday ushırasıw kesheleriniń shólkemlestiriliwi keleshekte óz jemisin bereri sózsiz.

Turdıbek Naurızbaev
Qaraqalpaq filologiyası hám jurnalistika fakulteti studenti, «Kitapqumarlar» klubı aǵzası