– Kúnde bir nárse alıp qaytpasań, kewliń kenshimeydi, deydi eken Dinoranıń toparlas dosları onıń kúndelikli jetiskenliklerin kórip.
Shınında da, ol jaqın waqıt aralıģında bir emes, bir neshe jetiskenliklerge erisip úlgerdi.
Saytımızda ilgeride járiyalanģanınday, «Jıl studenti – 2021» tańlawınıń universitet basqıshında «Jıldıń óz qániygeligi boyınsha eń bilimdan studenti» nominaciyası boyınsha sıylı 2-orındı iyelewi onıń usı bayram qarsańındaģı tuńģısh jetiskenligi boldı.
Ózbekstan Respublikası Prezidenti janındaģı mámleketlik xızmetti rawajlandırıw agentliginiń «Keleshek liderleri» klubındaģı Dinoranıń belsendiligi de joqarı bahalanģan. «Keleshek liderleri forumi – 2021» forumında agentlik tárepinen klubtıń saylandı aģzalarına «Húrmet jarlıģı» tapsırılģan bolsa, bunı Qaraqalpaqstan Respublikası Joqarģı Keńesi baslıģı Murat Kamalovtıń qolınan alıw oģan úlken maqtanısh hám motivaciya baģıshladı.
Sonday-aq, Jaslar isleri agentligi Qaraqalpaqstan Respublikası basqarması janında dúzilgen «Jas dóretiwshiler» klubı baslaması menen ótkerilgen «Duel» tańlawında proza jónelisi boyınsha sıylı 1-orındı iyelegeni Dinoranıń jazıwshılıq qábiletin júzege shıģarıp, oģan óz dóretiwshiligine bolģan isenimin kúsheytirdi.
Tınıp-tınshımaģan Dinora óz tabısları menen jaqınların tek ģana quwantıp qoymastan, olardı da óz jolına jeteledi. Óz perzentiniń miynetleri arqasında anası da jetiskenlikke eristi, yaģnıy, universitet rektorı tárepinen «Alģısnama» menen sıylıqlandı.
Anasınıń, fakultetiniń, liderler klubınıń hám jas dóretiwshilik maydanınıń maqtanıshı bolģan hám shın mániste jıl studenti atanıp otırģan qaharmanımız ózine qaratılģan bunday itibardan tolqınlana otırıp, «Meni ilimge-bilimge iytermelegen ustazlarım, ásirese, ilimiy basshım Dj. Kurbanbaevqa, dóretiwshilik salasındaģı ustazlarım A. Abdiev, A. Sultanov, M. Tawmuratov, liderler klubındaģı jetekshimiz K. Seytniyazovqa hám álbette, bul jetiskenliklerim tiykarında turģan qollap-quwatlawshı insan – anam T. Begilovaga minnetdarshılıģım sheksizlik dárejesinde!» deydi.
Guljaxan TAJETDINOVA.
QMU Baspasóz xızmeti
