Universitettiń ilimiy, innovaciyalıq jetiskenliklerine ózleriniń úlesin qosqanlıǵı ushın studentlerimiz xoshametlenbekte

2021-jıldıń 21-22-dekabr kúnleri Ózbekstan Respublikası Innovaciyalıq rawajlanıw ministrligi imaratında jaslardıń innovaciyalıq ideyaları hám startup joybarların ámelge asırıw, olardıń innovaciyalıq isbilermenlik kónlikpelerin rawajlandırıw maqsetinde Ózbekstan Respublikası Jaslar isleri agentligi, Bántlik hám miynet múnásábetleri ministrligi hám BMSH Rawajlandırıw Baǵdarlamasınıń “Ózbekstanda jaslar bántligine kómeklesiw”  qospa joybarı sheńberinde “Jaslar keleshegimiz” fondı menen birge islesiwde “Startup baslamaları” tańlawınıń juwmaqlawshı basqıshı – “Demo day” (Prezentaciya kúni)  hám Qaraqalpaqstan Respublikası, barlıq wálayatlardan kelip túsken eń jaqsı 40 startup joybarlarınıń kórgizbesi ótkerildi.

Kórgizbede Qaraqalpaq mámleketlik universitetiniń student jasları da belsendi qatnastı. “Qurılıs” fakulteti “Imarat hám inshaatlar qurılısı” qánigeligi 4-kurs studentleri Jumamuratov Begdiyar hám Maxambetaliev Arif-Xajiyler  ózleriniń “ED CONNECT – mayıplar arbashası ushın tez hám ańsat biriktirilip sheshiletuǵın, uzaq aralıqlarǵa ańsat hám kóp energiya sarıp etpesten jetip barıw tirkemesin islep shıǵarıw” joybarı menen hámde “Ekonomika” fakulteti “Finans” qánigeligi 4-kurs student Narbaev Sultanbek  óz toparı menen birgelikte ózleriniń  “KORCHI – qarıydarlardı tartıw, ónimler hám biznes haqqında tolıq maǵlıwmatqa iye bolǵan platforma”  joybarı menen  qatnastı hám jeńimpaz dep tabıldı hámde óz joybarların ámelge asırıw ushın hárbir joybar iyeleri 50 mln swm maqsetli grant qarjıların utıp aldı.

Respublikalıq tańlawlarǵa qatnasıp, universitettiń ilimiy, innovaciyalıq jetiskenliklerine ózleriniń úlesin qosqanlıǵı ushın bul grant utıp alǵan studentlerimizdiń hárbiri eki bazalıq stipendiya muǵdarında bir mártelik pul sıylıǵı menen xoshametlenedi.

Ilimiy innovaciyalıq islenbelerdi kommerciyalastırıw bólimi

Пайдалы дереклер