⚡️ Berdaq atındaǵı Qaraqalpaq mámleketlik universitetiniń alımları, professor-oqıtıwshıları, jas innovatorları “Moynaq innovaciyalıq forumı” hám  “Jas innovatorlar” kórgizbesinde belsendi qatnastı

 2022-jıl 26-fevral kúni Moynaq rayonı Mádeniyat sarayında Ózbekstan Respublikası Innovaciyalıq rawajlanıw ministrligi hám Ózbekstan Respublikası Bas prokuraturası menen birgelikte elimizde ilim hám óndiristi baylanıstırıw, ilimiy-ámeliy hám innovaciyalıq joybarlardı, islenbelerdi jáne de jetilistiriw maqsetinde Qaraqaqalpaqstan Respublikası joqarı oqiw orınları, ilim-izertlew institutları alımları, professor-oqıtıwshıları, jas innovatorlar hám respublika isbilermenleri qatnasıwında “Moynaq innovaciyalıq forumı” hám  “Jas innovatorlar” kórgizbesi bolıp ótti.

Forumdı Ózbekstan Respublikası Bas prokuraturası basqarması baslıǵı B.Nawrızbaev, Moynaq rayonı hákimi E.Edenbaev, Qaraqaqalpaqstan Respublikası aymaqlıq innovaciyalıq rawajlanıw basqarması baslıǵı N.Kayupov kiris sóz benen ashıp berdi hám forumnıń respublikamız xalıq xojalıǵındaǵı áhmiyetin atap ótti.

Forumda joqarı oqıw orınları, ilim-izertlew institutları sıyaqlı Berdaq atındaǵı Qaraqalpaq mámleketlik universitetiniń alımları, professor-oqıtıwshıları, jas innovatorları da belsendi óz joybarları, islenbeleri menen belsendi qatnastı. Forum sońında aymaqlardaǵı jaslardıń intellektuallıq dárejesin rawajlandırıw maqsetinde ótkerilgen “Jas innovatorlar” kórgizbesinde belsendi qatnasqanlıǵı ushın Qaraqalpaq mámleketlik universitetiniń Ilimiy isler hám innovaciyalar boyınsha prorektorı I.Turdimambetov, “Ekologiya hám topıraqtanıw” kafedrası docenti A.Mambetnazarov, “Fizikalıq kolloid ximiya” kafedrası baslıǵı A.Sharipova, “Arxitektura” kafedrası úlken oqıtıwshısı N.Kaliev Ózbekstan Respublikası Innovaciyalıq rawajlanıw ministrligi hám Ózbekstan Respublikası Bas prokuraturasınıń “Alǵısnama”sı menen sıylıqlandı.

“Moynaq innovaciyalıq forumı” hám  “Jas innovatorlar” kórgizbesi júdá kóterińki ruwxda ótkerildi.

 

 

 

Пайдалы дереклер