Университет жаслары менен Ишки ислер уйымы хызметкерлери ушырасты

 

 

          Бердақ атындағы Қарақалпақ мәмлекетлик университети ҳәм Қарақалпақстан Республикасы Ишки ислер министрлиги менен биргеликте жаслар арасында жынаятшылықтың, ҳуқықбузарлық ҳалатлардың алдын алыў ҳәм жол транспорт ҳәрекети қәўипсизлигин тәмийинлеў мақсетинде семинар болып ѳтти.
Семинарда Нѳкис қалалық Ишки ислер органларының жумысларын муўапықластырыў басқармасы баслығы орынбасары подполковник Тилеўмуратов Азамат Мақсетович ҳәм Нѳкис қалалық Жол ҳәрекети қәўипсизлиги бѳлими баслығы Мусагалиев Ерполат Жумагулович, Нѳкис қалалық 3-санлы Ишки ислер бѳлими профилактикалық инспекторы Ережепов Инам қатнасты.
Семинарды Қарақалпақ мәмлекетлик университети Жаслар менен ислесиў ҳәм руўхый-ағартыўшылық ислери бѳлими баслығы Қ.Бекназаров басқарып барды.
Семинар күн тәртибинде жаслар арасындағы жүз берип атырған жынаятлар, ҳуқықбузарлық ҳалатлардың жағдайлары ҳаққында сѳз етилди.

 

 

          Атап айтқанда, бүгинги күнде жаслар арасында кѳп тарқалып атырған телефон урлықлары, кафе-ресторанларда спиртли ишимликлер ишип жәнжеллесиў ҳалатлары, бир-бирине дене жарақатларын жеткериў ҳәм ҳәр қыйлы жынаят ислерине қол урып жынайый жуўапкершиликке тартылыўдың ақыбетлери түсиндирилди. Сондай-ақ, автотранспортлардан пайдаланып авариялық жағдайлардың келип шығыўы, жол қағыйдаларына бойсынбастан жол ҳәрекетин бузып инсан саламатлығына ҳәм ѳмирине қәўип туўдырыўшы жағдайлар ҳаққында видео-роликлер қойып берилди.

 

 

         – Ушырасыў студент-жаслар ушын тәрбиялық саат болды десек қәтелеспеген боламыз, олардың билимли ҳәм илимли болыўы ушын университетте шѳлкемлестирилген 20 дан артық клубларға, дѳгереклерге ҳәмде оқыў курсларына қатнасыўын тәмийинлесек, Биз, жаслардың жынаят ислеўине имкан бермеген боламыз дейди – семинар модераторы Қ.Бекназаров.

 

 

          Семинарда орган хызметкерлери тәрепинен студентлерге ѳзлериниң қымбатлы мәслаҳатлерин берип, оқыўдан тысқары ўақытларын билим алыўға, ѳнер үйрениўге ҳәм басқа да исбилерменлик пенен шуғылланыўға шақырды.

Пайдалы дереклер