Rossiya Federaciyasınıń Moskva qalasında Ózbekstan Respublikası Innovaciyalıq rawajlanıw ministrligi tárepinen jas ilimpazlardı stajirovkaǵa jiberiw ushın ótkerilgen tańlawda jeńimpaz bolǵan Qaraqalpaq mámleketlik universiteti “Elektr energetikası” kafedrası baslıǵı, PhD, docent Reymov Kamal Mambetkarimovich «НТЦ ФСК ЕЭС» AJda prof. D.I. Panfilov ilimiy basshılıǵında ilimiy stajirovka alıp bardı. «НТЦ ФСК ЕЭС» AJ elektroenergetika tarawı boyınsha ilimiy-izertlewler alıp baratuǵın jetekshi ilimiy shólkem esaplanıp, injiniring xızmetlerin kórsetedi hám tarawǵa innovaciyalıq texnologiyalardı engiziw boyınsha jumıslardı ámelge asıradı. Usınıń menen bir qatarda elektr texnologiyalıq qurılmalardı sınaw hám sertifikaciyadan ótkeriw, elektr tarmaqların joybarlaw baǵdarlarında iskerlik júrgizedi. Ilim-pánni finanslıq támiynlew hám innovaciyalardı qollap-quwatlaw fondı tárepinen qarjılandırılǵan ilimiy stajirovka dawamında K.M.Reymov dáslep «НТЦ ФСК ЕЭС» AJ administraciyası menen ushırasıw ótkerilip, stajirovka dawamında ámelge asırılatuǵın wazıypalar talqılandı. Qaraqalpaq mámleketlik universitetinde alıp barılıp atırılǵan ilimiy-izertlew jumısları hám stajirovka baǵdarlaması prezentaciyası ótkerildi. Milliy izertlewler universiteti Moskva energetika institutındaǵı ilimiy laboratoriyalar hám ámelge asırılıp atırǵan ilimiy joybarlar menen tanısılıp, sheriklikte joybarlar orınlawdıń keleshegi talıqlandı. Ilimiy sapar, stajirovka baǵdarlamasına tiykar dawam etti.

QMU baspasóz xızmeti