Bársheńizdiń xabarıńız bar usı jılı 29-30 sentyabr kúnleri Axmet Yassaviy tariyqatınıń dawamshısı Hákim Ata – Sulayman Baqırǵaniydiń 900 jıllıǵına arnalǵan Xalıqaralıq ilimiy-ámeliy konferenciya bolıp ótken edi. Konferenciya hám Infotur dawamında Moynaq rayonında «Aral balıqlarınan 99 túrli taǵam» gastronomiyalıq festival, Moynaq rayonı aymaǵında jaylasqan Hákim ata – Sulayman Baqırǵaniy ziyarat kompleksine sapar shólkemlestirilip miymanlar ulamanıń maqbarasın ziyarat etip, usı orında QMUdıń Arxeologiya kafedrası tárepinen alıp barılıp atırǵan arxeologiyalıq qazıw jumısları menen jaqınnan tanıstı.

Konferenciya hám Infotur dawamında shet elli miymanlardan (Qazaqstan, Tadikstan, Qırǵızstan) Qaraqalpaq mámleketlik universiteti quramındaǵı Repressiya qurbanların eslew muzeyinde bolıp, muzeydiń kórgizbe zalındaǵı eksponatlar menen tanıstı, muzeydiń Orta Aziyanı patsha Rossiyası tárepinen basıp alınıwı (kolonial dáwiri), XIX-XX ásir baslarındaǵı xalıq azatlıq háreketleri, 1980-jıllardaǵı repressiyalar- “Paxta isi” kompaniyası dáwiri ekspoziciyasınıń qurlısı  haqqında óziniń máslahátlerin berip, muzeydiń húrmetli miymanlar kitabına óziniń pikir usınısların jazıp qaldırdı. 

Ańsatbay Alimbetov

Muzey xızmetkeri.