Búgin Berdaq atındaǵı Qaraqalpaq mámleketlik universitetinde Qaraqalpaqstan Respublikasına miyneti sińgen jaslar ustazı, Qaraqalpaqstan xalıq bilimlendiriw aǵlası, ximiya ilimleriniń kandidatı, docent Bazarbay Tańirbergenovtıń 80 jıllıq yubileyine arnalǵan «Aralboyı aymaǵında ximiya hám ximiyalıq texnologiyanıń rawajlanıwınıń házirgi zaman tendenciyaları» atamasındaǵı Respublikalıq ilimiy- konferenciya bolıp ótti.
Onda ilimpazlar, professor-oqıtıwshılar, nuraniylar, student-jaslar hám ǵalaba xabar qurallarınıń wákilleri qatnastı. Konferenciyanı universitetimizdiń Ilimiy isler hám innovaciyalar boyınsha prorektorı I.Turdımambetov ashıp berdi hám alıp bardı. Ol óz sozinde Házirgi waqıtta, Húrmetli Prezidentimizdin tikkeley baslaması menen, jámiyetimizde ilimniń rolin kúsheytiw, ásirese, akademiyalıq ilimniń abıroyın arttırıw, ilim tarawınıń intellektual potencialın bekkemlew, talantlı jaslardı ilimge keńnen tartıw hám ilim jolında pidákerlik penen xızmet etken alımlardıń mashaqatlı miynetlerin qádirlew mámleketlik siyasatı dárejesine kóterilgenin aytıp ótti. Sonday-aq bul tarawda barlıq kúsh-jigerin, bilimin hám ilimiy tájiriybesin jaslarǵa ayanbay úyretip kiyatırǵan Qaraqalpaqstan Respublikasına miyneti sińgen jaslar ustazı, Qaraqalpaqstan xalıq bilimlendiriw aǵlası, ximiya ilimleriniń kandidatı, docent Bazarbay Tańirbergenovtıń miynetlerin ayrıqsha maqtanısh penen atap, onıń búgingi múbárek 80 jası menen qutlıqlap konferenciya jumıslarına tabıslar tiledi.
Konferenciyada Qaraqalpaqstan Respublikası Joqarǵı Keńesiniń Komitet baslıǵı D.Qurbaniyazov shıǵıp sóylep, 80 jasqa tolıwı múnásibeti menen Qaraqalpaqstan Respublikası Joqarǵı Keńesi atınan qutlıqlap, Qaraqalpaqstan Respublikası Joqarǵı Keńesiniń “Ardaqlı nuranıy” kókirek belgisin tapsırdı.
Bunnan soń, sózge shıqqanlar ustazdıń ómir jolı, ilimiy miynetleri, ilimiy–pedagogikalıq hám jámiyetlik–siyasiy jumıslardaǵı belsendiligi haqqında bayanat jasadı. Haqıyqatında da Mámleketti – qúdiretli, milletti – ullı etetuǵın kúsh, bul – ilim-bilim, tálim hám tárbiya ekenligi dáliyl talap etilmeytuǵın haqıyqatlıq. Jańa Ózbekstanda ilim-bilimge itibar joqarı shıńǵa shıqtı desek asıra aytqan bolmaymız. Búgin Qaraqalpaqstan Respublikasına miyneti sińgen jaslar ustazı, Qaraqalpaqstan xalıq bilimlendiriw aǵlası, talapshań hám miyirman ustaz, óz isiniń haqıyqıy pidayısı bolǵan Ximiya ilimleriniń kandidatı, docent Bazarbay Tańirbergenovtıń 80 jasqa tolǵan yubileyi menen universitetimiz jámááti atınan qızǵın qutlıqlaymız! Ustazǵa bekkem densawlıq, ilimiy-dóretiwshilik jumıslarında tabıslar tilep qalamız.
QMU baspasóz xızmeti
