“Dunyoda millatning borligini bildiradigan oynai
hayoti bu uning tili va adabiyotidir”
A.Avloniy
O‘zbek filologiyasi fakultetida “Davlat tili- birligimiz, borligimiz ramzi” mavzusida davra suhbati o‘tkazildi. Tadbirda O‘zbek filologiyasi fakulteti bilan birgalikda Qoraqalpoq filologiyasi va jurnalistika fakulteti hamda Chet tillari fakultetining iqtidorli talabalari ishtirok etishdi. Mavzu yuzasidan O‘zbek tili va adabiyoti kafedrasi f.f.f.d Z.Kabulova, katta o‘qituvchi G.Doshanova, assistent Yu.Nurjanovalar bugungi kunda dolzarb masala bo`layotgan Lotin yozuviga asoslangan o‘zbek alifbosida o`zgarishi kutilayotgan harflar borasida to‘xtalib o‘tdilar. O‘zbek tili va adabiyoti kafedrasi assistenti Yu.Nurjanova davlat tili haqida quyidagilarni bayon etdi. Ona tili – millatning ruhi, uning or-nomusi, ma’naviy qiyofasi, orzu-umidlarning namunasidir. U millatni yagona xalq sifatida o‘z atrofida birlashtiradi va dunyoda borligini ta’min etadi. Har bir millatning o‘z Vatani, oilasi bo‘lgani kabi uning jonajon va betakror ona tili ham bo‘ladi. Inson uchun uning vatani, ota-onasi, oilasi qanchalik qadrli bo‘lsa, uning ona tili ham shu qadar aziz va muqaddas bo‘ladi. Hattoki, go‘dak ham o‘z vatanini, ota-onasini, dunyoni o‘z ona tili orqali anglaydi va atay boshlaydi. Farzand tarbiyasida onaning o‘rni beqiyos bo‘lganidek, insonning hayotda o‘z o‘rnini topishida, kamolotga erishuvida tilning o‘rni ulkan ahamiyatga ega. Shu bois tilni, onaga qiyoslab ona tili deb ataydilar. Til inson vujudida qon-qoniga singib oqadi. Jamiki, ezgu fazilatlar, avvalo, ona allasi va ona tilining bebaho jozibasi orqali singadi. Inson qalbida ona tiliga nisbatan sof tuyg‘u, mehr-muhabbat alanga oladi. Zero, Turk dunyosining buyuk marifatparvar ijodkori Ismoilbek Gaspirali aytganidek, “Millatning ikki asosi bordur. Bu ularning tili va dinidur. Agar millat hayotidan shu ikkisidan biri sug‘urib olinsa, bu millat tanazzulga yuz tutur”. Davra suhbati oxirida talabalar o‘zlarini qiziqtirgan savollarga javob oldilar.
O‘zbek tili va adabiyoti kafedrasi
assistenti Yu.Nurjanova
