«Йил талабаси 2020» танловининг университет босқичида Қорақалпоқ филологияси ва журналистика факультети Журналистика таълим йўналиши 3-босқич талабаси Латипов Адилбек Полатбаевич “Йилнинг энг фаол ижодкор талабаси” номинацияси бўйича  ғолиб деб топилди.

Латипов Адилбек Полатбаевич 2018 йили Бердақ номидаги Қорақалпоқ давлат университетининг Қорақалпоқ филологияси ва журналистика факультети бакалавр таълим йўналишига ўқишга қабул қилинган.

У интилувчан, билимга чанқоқ, меҳнатсевар ва тиришқоқ талаба сифатида ажралиб туради. Берилган топшириқ ва вазифаларга масъулият билан ёндашиб, барча фанларни қунт билан ўрганиб, аъло даражада ўзлаштирмоқда. Шу билан бирга илмий тадқиқот ишларини олиб боришга лаёқатли. Унинг қатор илмий мақолалари  Россия, Ҳиндистон, Польша каби мамлакатларнинг илмий журналларида, конференция ва анжуман материалларида ўз аксини топган. Ижодий ишлари республикамиз нашрларида мунтазам ёритиб борилади.

Ўқиш ва илмий-ижодий ишларини олиб бориш билан бир қаторда, Адилбек Латипов Халқаро, республика ва университет миқёсида ўтказиладиган кўрик-танловларда ҳам фаол иштирок этиб келмоқда. Улардан энг йирик ютуқлари сифатида, 2018 йил ўтказилган “Ана тилим – мақтанышым” номли ижодий ишлар танловида 1-ўринни, 2019 йил Муҳаммад Юсуф таваллудининг 65 йиллиги муносабати билан ўтказилган Халқаро ижодий танловда  2-ўринни, 2019 йил республика миқёсида ўтказилган “Ҳумо-2019” эртаклар танловида 1-ўринни, 2020 йил Муҳаммад Юсуф таваллудининг 66 йиллиги муносабати билан ўтказилган Халқаро ижодий танловда 1-ўринни, шу йили Қозоғистон Республикасида ўтказилган “Болалик даврига саёҳат” номли Халқаро ижодий танловда 3-ўринни, Япониянинг “Goi Тинчлик Фонди” томонидан ўтказилган Халқаро эсселар танловида иштирок этиб сертификат қўлга киритганини алоҳида эътироф этиш мумкин.

Қолаверса, шу йил Россияда ўтказилган “Россия и мир: история, политика, социология, экономика» конференциясида унинг илмий мақоласи энг яхши илмий иш сифатида Диплом билан тақдирланди. Қозоғистонда ўтказилган “МДҲнинг энг яхши ёш олими” халқаро танловида муносиб иштирок этди.

Шунингдек, у республика миқёсида ўтказиладиган илмий-амалий конференциялар, анжуман, семинар-тренинг ва фестивалларда фаол иштирок этиб, сертификатлар билан тақдирланган.

Шуни алоҳида айтиб ўтишимиз жоиз-ки, Адилбек Латипов Ўзбекистон Республикаси Олий Мажлис Қонунчилик Палатаси ҳузуридаги Ёшлар Парламенти аъзоси.

Яна бир эътироф этишга арзийдиган жиҳати, у Қозоғистон Республикасининг “Дунё истеъдодлари уюшмаси” ва Қирғизистон Республикасининг “Қирғизистон шоир-ёзувчилари” жамоат фонди аъзоси. Бугунги кунда www.kar24.uz Қорақалпоғистон ахборот сайтида мухбир сифатида фаолият юритмоқда. Республика нашрларида унинг 200 дан зиёд ижодий ишлари эълон қилинган. Адилбек Латипов фриланцер сифатида ҳам фаолиятини олиб бормоқда.

          Биз дўстимизни эришган ютуғи билан табриклаб, танловнинг кейинги босқичларида зафарлар тилаб қоламиз.

Гоззал Жалгасова

Саноат технологияси факультети 3-босқич талабаси