Búgin Qaraqalpaq mámleketlik universiteti shet tilleri fakulteti inglis til bilimi kafedrası tárepinen “Til bilimi hám shet tillerin oqıtıwdıń áhmiyetli máseleleri: jetiskenlikler hám innovaciyalar” atamasındaǵı xalıq aralıq ilimiy ámeliy konferenciyası bolıp ótpekte.
Konferenciyanıń tiykarǵı maqseti tájiriybeli ilimpazlar, alımlar hám sırt elli qanigeler menen oqıw orınlarında oqıp atırǵan studentler hám professor-oqıtıwshılar arasında óz-ara birge islesiw, pikir almasıw, is-usıl metodların, tájiriybelerin úyreniw hám qáliplestiriw bolıp tabıladı.
Konferenciyanı Qaraqalpaq mámleketlik universiteti rektorı, A.Reymov ashıp berdi hám konferenciya jumıslarına tabıslar tiledi. Konferenciyada Malayziyanıń Linkolin universiteti wákili Doktor Rashid, Ózbekstan Jáhán tilleri universiteti rektorı I.Tuxtasinov, Shıǵıstanıw fakulteti dekanı docent D.Juraevlar qutlıqlaw sózi menen onlayn qatnasıp, ilim, bilimlendiriw tarawında birge islesiw jumısların alıp barıw máselesinde óz usınısların bildirdi.
Konferenciyaǵa shet elli alımlar, Kazan federal universiteti filologiya ilimleri doktorı, professor G.Galiullina, Xoja Axmet Yasawi atındaǵı Kazaq-túrk ilimiy izertlew universiteti filologiya ilimleri kandidatı, docent Ábjet Baxıt Sırım ulı, sociologiya ilimleri kandidatı docent Túrlıbekov Berdibay Duysenbek ulı, L.N.Gumileva atındaǵı Evraaziya milliy universiteti pedagogika ilimleri kandidatı R.F. Jusupova, Prezident mektebiniń shet elli oqıtıwshısı Zora Kefferler óz dokladları menen qatnastı.
Bul konferenciya baslı ilimdegi mashqalalardı sheshiwde, ásirese, shet tillerin uyretiw hám til bilimi tarawındaǵı jańalıqlar, rawajlanıwlar hám bilimlerdi puxta iyelewge, qaratılǵan. Prezidentimiz Sh.M.Mirziyoev shet tillerin uyreniw baǵdarına úlken itibar qaratpaqta hám óz shıǵıp sóylewlerinde “Keleshekke bekkem tiykar bolatuǵın shet tillerin uyretiwdin jańa sistemasın jaratıw waqtı keldi” dep atap ótken edi.
Bul ótkerip atırǵan ilimiy ámeliy konferenciyamızda prezidentimizdiń alǵa qoyǵan maqsetlerin, ideaların qollap – quwatlaw is juzinde ámelge asırıw hám turmısqa engiziw bolıp tabıladı. Konferenciyanıń ótkeriliwi Respublikamız xalqı, ullı bilim dargayımız Qaraqalpaq mámleketlik universiteti ushın da júda áhimiyetli. Bul konferenciya barlıq til bilimi pidayıları, ilim xızmetkerleri, professor oqıtıwshılar hám student-jaslar aldına qoyılǵan juwapkershilikli wazıypa ilim, bilimlendiriw tarawındaǵı jańalanıwdıń baslı baǵdarı bolıp xızmet atqaradı.
Dilfuza Badirova
Inglis til bilimi kafedrası assistenti
