Жақында университетимизде Корея энергетика агентлиги ўәкиллери ҳәм энергетика тараўы қәнигелери мийманда болғанлығы ҳаққында хабарлаған едик. Усы илаж тийкарында Корея энергетика агентлиги ҳәм Hanbek construction компаниясы ўәкиллериниң ҚМУ админстрациясы менен рәсмий ушрасыўы болып өтти ҳәм Қарақалпақ мәмлекетлик университети менен биргеликте еки тәреплеме бирге ислесиў бойынша шәртнамаға қол қойылды.

Шәртнама тийкарында ҚМУ әтрапында қуяш электр станциясын қурыў ҳәм бул арқалы университетти толығы менен электр энергиясы менен тәмийинлеўге арналған жумыслар бойынша кең түрде пикир алысылды ҳәм алдағы бирге ислесиў бойынша перспективалы жобалар белгилеп алынды.

Айтып өтиў орынлы, Корея мәмлекети қайта тиклениўши энергия ислеп шығарыў ҳәм энергия ислеп шығарыў нәтийжелилигин арттырыў бағдарында жоқары тәжирийбеге ийе мәмлекет есапланады.

Келешекте университетимизде электр энергетикасы бойынша Корея тәжирийбелери кең түрде үйрениледи ҳәм бул бойынша профессор-оқытыўшылар ҳәм студент-жаслардың билим-көнликпелери турақлы түрде жетилистирилип барылады.

Баспасөз хызмети.