Усы жылдың 29-июнь күни Қарақалпақ мәмлекетлик университетиниң Мәденият сарайында 30-июнь – «Жаслар күни» мүнәсибети менен «Жаслар – Өзбекстан келешеги» сүрени астында салтанатлы кеше шөлкемлестирилди.

Салтанатлы кешени университеттиң жаслар менен ислесиў бойынша проректоры О.Дуйсенбаев ашып берди.

Илажда Өзбекстан Жаслар аўқамы Қарақалпақстан Республикасы кеңеси баслығының орынбасары Б.Аралбаева, университеттиң Ҳаял-қызлар басланғыш шөлкеминиң баслығы И.Сейтназарова ҳәм басқалар шығып сойлеп, студент-жасларды 30-июнь – «Жаслар күни» менен қутлықлап өтти.

Шығып сөйлеўшилердиң атап өткениндей, бүгин, университетимизде заманагөй билим ҳәм илим сырларын терең ийелеп, бийғәрез пикирлейтуғын, өз Ана журтына меҳир ҳәм садықлық туйғысы менен жасайтуғын жаңа әўладты тәрбиялаў жумыслары талап дәрежесинде толық жуўап береди. Өйткени, студент-жасларымыз арасынан быйылғы оқыў жылында 2 Президент стипендианты, 2 Беруний, 1 Наўайы, 1 Улуғбек, 1 Ислам Каримов атындағы  ҳәм 7 Бердақ атындағы мәмлекетлик стипендия жеңимпазларының шыққаны, сондай-ақ, бир неше Жәҳән, Азия, Өзбекстан чемпионлары ҳәм басқа да көплеген спорт жарысларының жеңимпазлары жетисип шыққаны  менен мақтаныш етсек арзыйды.

Илаж даўамында 27-июнь – «Баспасөз ҳәм ғалаба хабар қураллары хызметкерлери күни» мүнәсибети менен университетимиздиң Баспасөз хызмети, «Қарақалпақ университети» газетасы редакциясы жәмәәти, «Қарақалпақстан» телеканалы ҳәм радиоканалының бир қатар журналистлери «Ҳүрмет жарлық»лары ҳам естелик саўғалары менен сийлықланды.

Сондай-ақ, университетимизде 2018-2019-оқыў жылында оқыўда, илим-билимлендириў, мәденият ҳәм спорт салаларында жетискенликлерге ерискен, жәмийетлик жумысларға белсене қатнасқан бир топар студент-жаслар да сыйлықланды.

 Кеше университетимиздиң «Ҳүрлиман» халық ансамбльи, университет Жаслар аўқамы «Китапқумарлар» клубы белсендилери тәрепинен шөлкемлестирилген аяқ-ойын ҳәм сахналық көринислер менен жалғасып кетти.

Мухаммед Қудайназаров,

Математика факультетиниң студенти.