Sentyabr ayınıń basınan-aq ámeliyatqa jol alģan QMU Qaraqalpaq filologiyası hám jurnalistika fakulteti 4-b kurs student jasları búgingi kúnge kelip, haqıyqıy pedagogqa aylanıp úlgergen desek asıra aytqan bolmaymız. Bir neshe ámeliyatshılardıń ashıq sabaqlarına qatnasıw arqalı bunıń guwası  boldıq. Dáslepki kúnlerdegi albırawshılıq sıyaqlı hár qıylı kemshilikler saplastırılģan. Ashıq sabaqta oqıwshılardıń dıqqatın ózine qaratıw maqsetinde hár qıylı kórgizbeli qurallardan paydalanıldı. Sap qaraqalpaq tilinde sabaqtı alıp barıp atırģan jas ámeliyatshılar jetilisken teoriyalıq bilimlerin ámelde kórsete aldı. Ózleriniń pedagogikalıq sheberliklerin iske salģan halda túrli interaktiv metodlardan paydalanıp, sabaq procesin jáne de bayıttı. Oqıwshılardıń bilim alıwģa degen qızıģıwshılıģı bolsa hárbir àmeliyatshınıń óz ústinde ele de islewge bolģan juwapkershiligin arttırmaqta. Sabaq sońında metodistlerimiz Allambergenova Gúljahan hám Palımbetova Malika jánede mekteptiń qaraqalpaq tili oqıtıwshısı Jumamuratova Gùlistanlar òz pikir hám usınısların bildirdi. Tán alıp aytıw kerek teoriyalıq bilimler hám ámeliyat ortasında ádewir parıq bar eken. Oqıtıwshı bolıwday mashaqatlı kásiptiń juwapkershiligin endi tùsingendey boldıq. Bunda bizge ámeliyat ùlken járdem berdi.

 

Qaraqalpaq filologiyası hám jurnalistika fakulteti

4-b kurs studenti Mustafaeva Periuza