Bùgin, 30-noyabr kùni Berdaq atındaģı Qaraqalpaq màmleketlik universitetinde « 1-dekabr Qaraqalpaq tiline màmleketlik til biyligi berilgenine 32 jıl tolıwı» mùnàsibeti menen universitet màdeniyat sarayında ushırasıw keshesi bolıp òtti.
Til bayramına arnalģan ushırasıwda Qaraqalpaq màmleketlik universiteti Qaraqalpaq til bilimi kafedrası baslıģı, filologiya ilimleriniñ doktorı, professor M.Qudaybergenov «Qaraqalpaq tiliniń rawajlanıw basqıshları» atamasındagʼı bayanatı menen qatnasıp, ana tilimizdiń rawajlanıw basqıshlarındaģı àhmiyetli màseleleri haqqında sòz etti.
Qaraqalpaqstan Respublikası Ministrler Keńesi janındaģı Màmleketlik tildi rawajlandırıw departamenti baslıģı P.Dabılov qatnastı hàm shıģıp sòyledi.
Qaraqalpaqstan Respublikasınıń màmleketlik tili haqqındaģı nızam qabıl etilgennen keyingi dàwirde qaraqalpaq tili turmısında bir qansha rawajlanıwlar hàm jańalıqlar payda boldı.
Mine usı tariyxıy hùjjetke tiykarlanıp qaraqalpaq tili bekkem huqıqıy tiykar hàm joqarı biylikke iye boldı.
Bizge belgili, hàr bir màmlekettiń dunıyada òzine say ornı, milliy kelbeti màmleketlik til arqalı sàwlelenedi. Tilge «millettiń ruwxı» dep te biykarǵa tàriyp berilmeydi. Sebebi, denedegi jan ruwx arqalı tiri bolsa, millet til menen jasaydı.
Bùgingi globallasıw dàwırinde hàr bir xalıq, hàr qaysı ǵàrezsiz màmleket òz milliy màplerin tàmiynlew, hàm bunıń barısında eń àwele òz màdeniyatın, àyyemgi qàdiriyatların, ana tilin qàdirlep saqlaw hàm rawajlandırıw màselesine àhmiyet qaratıwı tàbiyiy.
Bùgingi kùnde turmısımızda màmleketlik tildiń àmel etiliwi menen baylanıslı mashqalalardı anıqlaw hàm sheshıw boyınsha, sonday-aq, onı rawajlandırıw bagʼdarında Qaraqalpaqstan Respublikası Ministrler Keńesi janındaǵı Màmleketlik tildi rawajlandırıw departamenti shòlkemlestirildi. Bunday keń kòlemli jumıslardıñ negizinde ana tilimizdiń turmısımızda tutqan ornın hàm àhmiyetin jaslarımız sanasına jetkerip beriwde ayırıqsha àhmiyetke iye bolıp tabıladı, dep atap òtti shıǵıp sòylewshiler.
Til bayramına arnalgʼan ilaj student jaslar tàrepinen tayarlanǵan koncert baǵdarlaması menen dawam etti.
Gùljayna Mademinova,
QMU studenti
