Usı jıldıń 8-iyun kúni Berdaq atındaǵı Qaraqalpaqstan tariyxı hám mádeniyatı muzeyinde Qaraqalpaq mámleketlik universiteti «Kórkem-óner» fakulteti 2-kurs studenti Rasul Serimbetovtıń «DEBYUT» atlı jeke kórgizbesi bolıp ótti. Kórgizbede Ózbekstan kórkem akademiyası Qaraqalpaqstan bólimi bas ilimiy xatkeri A.Xojambergenov, Ózbekstan kórkem akademiyası Qaraqalpaqstan bólimi súwretlew (Xudojnikler) awqamı baslıǵı N.Aytmuratov, Berdaq atındaǵı Qaraqalpaqstan tariyxı hám mádeniyatı muzeyi direktorı Sh.Payzullaeva, «Kórkem-óner» fakulteti jaslar menen islesiw dekan orınbasarı I.Djumaniyazov, fakultet oqıtıwshıları, ata-anası hám student jaslar qatnastı.
Kórgizbede shıǵıp sóylewshiler R.Serimbetovtıń baslap atırǵan birinshi kórgizbesinde sáwlelengen súwretlew ónerinde elimizdiń tábiyatı, bunnan 50-60 jıl aldıńǵı Aral teńizimizdiń jaǵaları, bala tárbiyası h.t.b kórinisler sáwlelengenligi, keleshekte jas súwretshi R.Serimbetovqa respublikalıq hám basqada shet el mámleketlerinde kórgizbeler shólkemlestiriw, usı kórgizbe tiykarında basqada student jaslarımızǵa ruwxıy azıq berip, keleshekte basqada student-jaslarımız óziniń jeke kórgizbelerin beriw, oqıtıwshı hám fakultet tárepinen ámeliy járdemler beriw boyınsha aytıp ótildi.
Kórgizbe sońında R.Serimbetovtıń ata-anası sózge shıǵıp, usınday kórgizbeni shólkemlestiriwde ámeliy járdem kórsetken barlıq oqıtıwshılarǵa óz minnetdarshılıǵın bildirip aldaǵı jumıslarında tabıslar tiledi.
Shaxnoza Tajimuratova
Kórkem óner kafedrası oqıtıwshısı
