«Ámiwdárya» jurnalınıń 70-jıllardaǵı sanlarında jarıq kórgen «Poeziya gózzalıq», «Ájiniyazdıń sóz ustalıǵı haqqında geypara oylar», «Kewlimizge jaqın shayıra», «Bul dúnyanıń kórki adam balası», «Sóz saplaw sırı» jurnal oqıwshılarınıń bilimin bayıtıwda hám olarǵa oy salıwda ayrıqsha áhmiyetke iye bola baslaǵan edi. Maqalalar avtorı Ábdikerim Pirnazarov «Ájiniyazdıń shayırlıq sheberligi» atamasındaǵı ilimiy izertlew jumısın jaqlaw aldınan monografiyasın rus tilinde baspadan shıǵarıwǵa májbúr bolǵan edi. Biraq ótken asirdiń 60-70-jıllarında ádebiyat sınshısı sıpatında baspasóz betinde qızıqlı maqalaları menen kózge túsken izertlewshi dissertaciyasın jaqlaw ushın Tashkent qalasına barǵanında Dúrmendegi jazıwshılar úyinde 1978-jıldıń 3-oktyabr sánesinde endi ilimpaz bolıp qáliplesip atırǵan 38 jasında biymezgil dúnyadan ótedi…

Ádebiyatshınıń úyine jazǵan xatların, kúndeligin, súwretlerin, maqalaları shıqqan gazeta-jurnallardı hám dissertaciyalıq jumısınıń qoljazbaların derlik yarım ásir dawamında sandıqta saqlap kelgen qarındası Ámiyna Pirnazar qızı Jalimova jámiyetshiliktiń tilegi boyınsha bıyıl Nókis qalasındaǵı «AVAYGARD-BASPA» baspasınan 14 baspa tabaq kóleminde júz nusqada shıǵardı.

– Kitaptı tayarlaw barısında kóp izleniwime tuwra keldi. Russha basılımın qolǵa alıp otırıp, qol jazbası hám járiyalaǵan maqalaların  betpe bet, qatarma qatar, sózbe sóz salıstırıp shıqtım, túsinbegen jerleri bolsa qánige ádebiyatshılardan sorap anıqlastırdım,ayırım tekstlerdi lupa menen qarap kóshiriwge tuwra kelgen waqıtlar da boldı. Endi men ózimdi qustay jeńil sezip júrmen. Kitaptı tek qádirlep oqıytuǵın ádebiyattı súyetuǵın jaslarǵa ǵana sawǵa etemen, – ded ol biziń menen gúrrińleskeninde.

Shınında da ol, biziń universitetimizdiń málimleme resurs orayına bes kitap sawǵa etti,

Kitaptı student jaslarǵa tanıstırıw keshesi Májilisler zalında úlken kóterińkilik penen ótti. Oǵan belgili ádebiyatshı, tilshi hám jurnalist ustazlar, jámiyetshilik wákilleri, alımnıń izinde qalǵan jeti perzenti, aqlıqları qatnastı.

Atap aytqanda, filologiya ilimleriniń doktorı, professorlar Q.Járimbetov, Z.Bekbergenova, Yu.Ibragimov, filologiya ilimleriniń doktorı, docentler T.Masharipova, filologiya ilimleriniń kandidatı S.Bawatdinova, qaraqalpaq tili hám ádebiyatı muǵallimi, tajiriybeli ustaz G.Jaqsımova hám basqalar kitapqa óz pikirlerin bildirdi.

Durdana Perdebaeva