Nókis qalasında hám Moynaq rayonında 29-30-sentyabr kúnleri Hákim ata Sulayman Baqırǵanıydıń 900 jıllıǵına baǵıshlanǵan xalıqaralıq ilimiy ámeliy konferenciya bolıp ótti.29-sentyabr kuni Moynaq rayonında konferenciyanıń ashılıw máresimi bolıp ótti. Konferenciya «Aral hám Moynaqtıń tikleniwi» xalıq aralıq ekofestivalı, «Aral balıqlarınan 99 túrli taǵam» gastronomiyalıq festivalı menen baslandı. Miymanlar rayondaǵı «Aral teńizi tariyxı muzeyi»ndegi eksponatları hám Aral balıqlarınan tayarlarǵan 99 túrli taǵamlar menen tanıstı. Konferenciyanıń ekinshi kúninde Nókis qalasındaǵı «Jas tamashagóyler teatrı»nda bir qatar alımlar, ilim doktarları hám shet elli professorlar bayanat jasadı. Olar arasında atap aytsaq, Sidney universiteti professorı Betts Alison, Qazaqstan institutı ilimiy xızmetkeri Erlan Medeubaev, Rossiya Ilimler akademiyası Shıǵıstanıw institutı ilimiy xızmetkeri Tatyana Anikeeva, Xojend mámleketlik universiteti professorı Inomjon Mamadaliev siyaqlı sırt elli alımlar menen bir qatarda ÓzR IA ózbek tili ádebiyatı hám folklorı institutınıń ulken ilimiy xızmetkeri Rafiddinov Sayfiddin, Nókis mámleketlik pedagogikalıq institutı professorı Keńesbay Allambergenov, ÓzR IA ózbek tili ádebiyatı hám folklorı institutınıń jetekshi ilimiy xızmetkeri Burobiya Rajabova hám ÓzR IA Shıǵıstanıw institutınıń ulken ilimiy xızmetkeri Salimaxon Eshonova siyaqlı alım, professorlarımız sózge shıǵıp Hákim ata ómir jolı xaqqında, onıń qaldırǵan miyrasları haqqında jıynalǵanlarǵa maǵlıwmat berdi. Konferenciyaǵa Qaraqalpaq mámleketlik universitetinen Tariyx fakulteti dekani S.Sulaymanov hám Nókis mámleketlik pedagogikalıq institutınan tariyxshı hám arxeolog jaslar qatnastı. Konferenciya dawamında biz jas tariyxshı-arxeologlar sıpatında kóplegen jańadan-jańa maǵlıwmatlar menen tanıstıq. Sonday-aq, konferenciya kopshilik student-jaslar ushın ulken tájiriybe mektebi boldı. Sebebi, sırt elden kelgen iymanlar professor hám ilim doktarları tárepinen oǵada keń túrde maǵlıwmatlar berildi.
Tariyx fakulteti Arxeologiya bagdarı 4-kurs studenti Rasul Tlemisov
