Prezidentimizdiń Oliy Majlis hám Respublikamız xalqına jollaǵan múrájatı kópshilik tarawlar qatarı joqarı bilimlendiriw tarawı qánigelerin de tolqınlandırıp, aldımızǵa qoyǵan wazıypalardı shın júrekten orınlawǵa quwat baǵıshladı. Mámleketimizde qatar tarawlarda júrgizilip atırǵan reformalar, joqarı bilimlendiriwdi de shetlep ótpedi, tarawdı rawajlandırıw, kadrlar tayarlaw, mámleketimiz iliminıń potencialın jánede arttırıw máselelerine óz aldına itibar qaratılmaqta.
Prezidentimizdiń «Ózbekstan dep atalatuǵın úlken hám tatıw shańaraqtıń hár bir aǵzası tınısh hám abadan ómir súriwi ushın zárúr sharayatlar jaratıw jolında tınımsız izlenip atırmız» dep atap ótiwi, elimizde insan qádiriniń joqarı ekenliginen dárek beredi. Haqıyqatında da, 2023-jıldı elimizde Húrmetli Prezidentimiz tárepinen «Insanǵa itibar hám sapalı bilimlendiriw» jılı dep járiyalaw usınıs etildi. Mámlekettiń tiykarǵı baylıǵı esaplanǵan insanǵa itibar, sol mámlekettiń aldaǵı jarqın kelesheginen dárek beredi. Mámleket itibarın tereńnen sezingen hár bir insan, onıń keleshegine biyparıq bolıwı múmkin emes. Hár qanday rawajlanıwdıń túp-tiykarı sapalı bilimlendiriwge barıp taqalatuǵınlıǵı, dúnya tájiriybesinen jaqsı málim. Sonıń ushın da mámleketimiz basshısı óz Múrájatında «Bilimlendiriw sapasın arttırıw – Jańa Ózbekstan rawajlanıwınıń birden-bir tuwrı jolı bolıp tabıladı!» dep ayrıqsha keltirip ótti.
Mámleketimiz basshısınıń «Birinshi gezekte, itibardı Jańa Ózbekstan ushın eń úlken investiciya bolǵan bilimlendiriwdi qollap-quwatlawǵa qaratamız» dep atap ótiwi, tarawda nátiyjege baǵdarlanǵan reformalar ámelge asıwınıń tiykarı bolatuǵınlıǵı anıq.
Keyingi jıllarda joqarı oqıw orınları 2,5 ese kóbeyip, 198 ge jetti, qamtıw dárejesi 9 % ten 38 % ke kóbeydi, 41 joqarı oqıw ornına akademiyalıq hám finanslıq erkinlik berildi, olarda transformaciya ofisleri ashıldı. Usı tiykarda «Joqarı oqıw orınlarınıń rektorları, professor-oqıtıwshıları bul processlerde belsendi bolıwı, jańa aldıńǵı metodikalardı engiziwleri kerek» dep ayrıqsha atap ótti Prezidentimiz.
Múrájatta, «kelesi jılı joqarı oqıw ornı studentleri ushın jeńilletilgen tálim kreditlerine resurslar 2 esege kóbeytilip, 1,7 trillion sum ajıratıladı. Bıyıl ilim hám innovaciyalarǵa 1,5 trillion sum qaratıladı. Bul 2017-jılǵa salıstırǵanda derlik 6 esege kóp. Ilimpazlardıń miynet haqısı da 4,5 esege kóbeytildi. Bulardıń báriniń esabınan nano hám biotexnologiyalar, sanlı geologiya sıyaqlı 18 jańa ilimiy baǵdar shólkemlestirildi. Kelesi jılı ilim hám innovaciyalarǵa 1,8 trillion sum ajıratıladı» dep atap ótti elimiz basshısı.
Elimiz rawajlanıwında ayrıqsha áhmiyetke hám tereń mazmunǵa iye bolǵan, elimizdiń barlıq tarawların rawajlandırıw boyınsha áhmiyetli wazıypalardı óz ishine alǵan bul múrajattı tolıq úyreniw, belgilengen wazıypalardı ámelge asırıwda belsendilik qılıw taraw qánigeleriniń hám hár bir puqaranıń buljıtpas wazıypası bolıwı tiyis. Prezidentimizdıń «Rawajlanıwǵa – tek ǵana mashaqatlı miynet hám mártlik arqalı erisiledi» dep aytqanınday, elimizdiń rawajlanıwında mashaqatlı bolsada tuwrı joldan barıw hár birimizdiń tiykarǵı wazıypamız bolıwı kerek.
Fizika fakultetiniń dekanı
A.Muratov
