Ózbekstan Respublikası Prezidentiniń 2020-jıl 10-noyabr kúngi «Xalıqtıń salamat awqatlanıwın támiyinlew boyınsha qosımsha is-ilajlar haqqında»ǵı PQ-4887-sanlı qararınıń 14-bántine muwapıq, mámlekette azıq-awqat qáwipsizligin támiyinlew, puqaralarǵa sapalı hám ónimli awqatlıq zatlardı jetkerip beriwde sıpatlı xızmetler kórsetiwdi jolǵa qoyıw, usı tarawda iskerlik kórsetiwshi ministrlikler, mámleketlik shólkemler tárepinen ámelge asırılıp atırǵan jumısları menen tanısıw maqsetinde Qaraqalpaq mámleketlik universiteti student-jasları menen seminar bolıp ótti. Seminardı universitet Jaslar menen islesiw, ruwxıylıq hám aǵartıwshılıq isleri bólimi baslıǵı Q.Beknazarov ashtı hám basqarıp bardı.

Seminarda Qaraqalpaqstan Respublikası Básekelikti rawajlandırıw hám tutınıwshılar huqıqların qorǵaw komiteti baslıǵı orınbasarı A.Yusupov, Qaraqalpaqstan Respublikası Densawlıqtı saqlaw ministrliginiń shıpakeri V.Dawletmuratova, Ózbekstan milliy metrologiya institutı mámleketlik mákemesi Qaraqalpaqstan filialı bas qánigesi D.Utewlieva, Qaraqalpaqstan Respublikası Tutınıwshılar huqıqların qorǵaw jámiyetleri federaciyası Nókis qalalıq bólimi baslıǵı M.Mustapaev, Ózbekstan test Qaraqalpaqstan filialı qánigesi A.Qalbaev, Sanitariya-epidemiologiyalıq tınıshlıq hám jámiyet salamatlıǵı xızmeti Nókis qalalıq bólimi sanitariya shıpakeri U.Qudaybergenovalar qatnastı. Seminarda taraw qánigeleri student-jaslarǵa azıq-awqat ónimlerin satıp alıwda, awqatlanıw orınlarındaǵı sıpatlı ónimlerden paydalanıw, ulıwma tutınıwshılardıń huqıqları hám sanitariyalıq-epidemiologiyalıq jaǵdaylarǵa itibar qaratıw kerekligi boyınsha túsinik berildi.  Seminar dawamında student-jaslar taraw qánigelerinen ózleriniń qızıqtırǵan sorawlarına juwaplar aldı.