Búgin 5-aprel kúni Respublikamızdıń islep shıǵarıw sanaatı tarawlarında bar bolǵan mashqalalardı sheshiwde ilimiy-izertlew jumısların rawajlandırıw hám belgilengen wazıypalarǵa sheshim tabıw maqsetinde Qaraqalpaq mámleketlik universiteti Sanaat texnologiyası fakultetinde «Sanaat texnologiyalarındaǵı mashqalalardıń innovaciyalıq sheshimler» atamasında Respublikalıq ilimiy-ámeliy konferenciya bolıp ótti. Onda universitettiń ilimiy isler hám innovaciyalar boyınsha prorektorı I.Turdımambetov, Sanaat texnologiyası fakulteti dekanı R.Qurbaniyazov, fakultet professor-oqıtıwshıları, student-jaslar hám bir qatar miymanlar qatnastı.
Konferenciyanı universitettiń ilimiy isler hám innovaciyalar boyınsha prorektorı I.Turdımambetov kiris sóz benen ashtı hám alıp bardı. Ol óz sózinde Ózbekstan Respublikası Prezidentiniń 2019-jıl 16-sentyabrdegi PQ-4453-sanlı “Jeńil sanaattı elede rawajlandırıw hám tayar ónim islep shıǵarıwdı qollap quwatlaw is-ilajları haqqında” ǵı qararı hám Ózbekstan Respublikası Prezidenti Shavkat Mirziyoev basshılıǵında 2019-jıl 7-iyun kúni aymaqlarda sanaattı rawajlandırıw, tuwrıdan-tuwrı shet el investiciyalardı ózlestiriliwin jedellestiriw máselelerine baǵıshlanǵan videoselektor máilisinde belgilengen wazıypalar bul tarawda ilimiy izlenisler alıp barıp atırǵan ilimpazlar aldına úlken wazıypalar júklegenligine toqtalıp ótti. Islep shıǵarıw sanaatı tarawların rawajlandırıw tikkeley tájiriybe, ilim hám bilim iskerligi menen baylanıslı ekenin ayta otırıp konferenciya jumıslarına tabıslar tiledi.
Bunnan soń, konferenciyanıń ashılıw keshesine hám Plenar májilisine qatnasıp otırǵan miymanlarǵa sóz berildi hám Ustyurt geofizika ekspidiciyası óndiristi muwapıqlastırıw hám texnikalıq qollap quwatlaw texnikalıq bólimi baslıǵı Nawayı mámleketlik kánshilik hám texnologiyalar universiteti qasındaǵı Nókis kánshilik instituti «Kánshilik isi hám islep shıǵarıw texnologiyaları» kafedrası docenti. B.Saparov hám Qaraqalpaqstan Respublikası awıl xojalıǵı islep shıǵarıw kooperaciyası №1 filial qánigesi A.Bayımbetov bayanatlar jasadı.
Sonıń menen birge, tiykarǵı bayanatshılar B.Paluanov “Paxta-toʻqimachilik klasterlarning texnologik jarayonlar xususiyatlari tahlili” Ǵ.Allaniyazov, “Toʻqima yordamida insonlarni yelektromagnit nurlaridan ximoyalash” R.Orazbayeva, “Havo oʻtqazuvchan kostyumbop toʻqimalar uchun tolaviy tarkib tuzish”, R.Durdubaeva “Fosfor (v) xlorid hám ciyanur kislota tiykarında alınǵan ingibitordıń korroziyanıń aldın alıw nátiyjeliligin úyreniw”, D.Ametova “Развитие производства топливных присадок” hám T.Allamuratova “Разработка еффективной конструкции расправителя для оттяжки трикотажного полотна на круглооборотных машинах” temasında bayanatlar qıldı. Konferenciya qatnasıwshıları tárepinen bayanatshılarǵa sorawlar berildi hám tiyisli juwaplar aldı. Konferenciya sekciyalarda dawam etip, sekciya májilisin fakultet dekanı R.Qurbaniyazov alıp bardı. Konferenciyada Sanaat texnologiyası fakulteti professor-oqıtıwshıları, Qaraqalpaq mámleketlik universiteti magistrantları hám de bakalavr tálim baǵdarlarında oqıp atırǵan student-jaslar óz bayanatları menen qatnasdı.
Konferenciyanı ótkeriwden tiykarǵı maqset, universitet professor oqıtıwshıları, magistrantlar ham bakalavr tálim baǵdarlarında oqıp atırǵan student-jaslardıń alıp barıp atırǵan ilmiy izertlew jumısların talqılaw hám de Respublikamızda Sanaat kárxanalarında kelip shıǵıp atırǵan óndirislik mashqalalardıń ilimiy jaqtan sheshimin tabıwǵa qaratılǵan ilimiy izertlew jumısları menen tanısıwdan ibarat.
