Húrmetli Prezidentimizdiń 2022-jıl 16-noyabrdegi “Kibersport túrlerin jáne de rawajlandırıw hám keń túrde ǵalabalastırıwǵa tiyisli qosımsha is-ilajlar haqqında”ǵı qararında kibersport jarısların shólkemlestiriw hám rawajlandırıw boyınsha qatar wazıypalar belgilep berilgen.

Usı tiykarda búgin «Ziyo Forum» Ilim hám tálim-tárbiyanı rawajlandırıw Xalıqaralıq Fondı tárepinen student jaslardıń bos waqıtların mazmunlı shólkemlestiriw maqsetinde Tashkent qalasında joqarı oqıw orınları studentleri arasında kibersporttıń CS:2 túri boyınsha jarıs ótkerildi.

Qızǵın bellesiwlerge bay ótken jarıs juwmaǵında Berdaq atındaǵı Qaraqalpaq mámleketlik universiteti komandası barlıq qarsılaslarınan ústem kelip, sıylı 1 orındı iyeledi.

Kibersport túri elimizde keń túrde rawajlanıp, bul kibersport oyını ózine tán kompyuter oyınlarınıń biri, onda kibersportshılar komandalıq yamasa individual tárzde óz-ara kúsh sınasadı.

Elimizde sportqa qaratılǵan joqarı dıqqat-itibar nátiyjesinde, sportqa qızıqqan jaslarımız ushın imkaniyatlar kólemi keńeyip, sport penen shuǵıllanıwshı jaslarımız arasında sport túrlerinen ótkerilip atırǵan jarıslar, erisip atırǵan jetiskenlikler olardıń sportqa degen ıqlasın jánede arttırıp barmaqta. Bunıń ayqın mısalı sıpatında búgingi universitetimiz student-jaslarınıń qolǵa kirgizgen tabısların aytıp ótsek boladı. Bizde óz gezeginde Berdaq atındaǵı Qaraqalpaq mámleketlik universiteti jámááti student-jaslarımızdı qolǵa kirgizgen tabısları menen qutlıqlaymız hám aldaǵı oqıwlarında tabıslar tileymiz!