Xabarıńız bar, usı jıldıń 8-aprel kúni Berdaq atındaǵı Qaraqalpaq mámleketlik universiteti tárepinen paytaxtımızdaǵı joqarı oqıw orınları studentleri arasında Qaraqalpaqstan Respublikası Konstituciyası qaǵıydaları hám principlerin úyreniw boyınsha olimpiada ótkerilip, usı tiykarda búgin 9-aprel kúni Qaraqalpaq mámleketlik universiteti májilisler zalında jeńimpazlardı sıylıqlaw máresimi bolıp ótti.
Onda Qaraqalpaqstan Respublikası Joqarı bilimlendiriw, ilim hám innovaciyalar ministrligi juwaplı xızmetkeri Á.Medegenov, universitet rektorı A.Reymov, ilimiy isler hám innovaciyalar boyınsha prorektorı I.Turdımambetov, Yuridika fakulteti dekanı F.Qutlımuratov hám fakultet- professor-oqıtıwshıları, student-jaslar qatnastı.
Dáslep universitet rektorı A.Reymov olimpiada jeńimpazların qolǵa kirgizgen tabısları menen qızǵın qutlıqlap, olardıń bilim bergen ustazlarına óz minnetdarshılıǵın bildirdi. Sonday-aq, olimpiada juwmaqlarına kóre, eń joqarı orınlardı iyelegen qatnasıwshılar diplom hám estelik sawǵaları menen sıylıqlandı.
Bunnan soń, sózge shıqqanlar jeńimpazlardı qutlıqlap, keleshekte ustazlarınan alǵan bilimlerin mámleketimiz rawajlanıwı jolında ayanbay xızmet etetuǵın jetik kadrlar bolıp jetilisiwine isenim bildirip, olarǵa aldaǵı oqıwlarında, jumıslarında tabıslar tiledi.
Olimpiadanıń nátiyjeleri bola;
1-orın: Berdaq atındaǵı Qaraqalpaq mámleketlik universiteti Yurisprudenciya tálim baǵdarı 1-kurs studenti Tursınbaev Allabay Baxadirovich
2-orın: Berdaq atındaǵı Qaraqalpaq mámleketlik universiteti Yurisprudenciya tálim baǵdarı 2-kurs studenti Karimbaev Ersultan Polat ulı hám Qaraqalpaq mámleketlik universiteti Yurisprudenciya tálim baǵdarı 2-kurs studenti Bekmuratov Samandar Ruslanbek ulı;
3-orın: Qaraqalpaqstan awıl xojalıǵı hám agrotexnologiyalar institutı Yurisprudenciya tálim baǵdarı 1-kurs studenti Saydabaullaev Orzubek Sobir oǵli hám de Berdaq atındaǵı Qaraqalpaq mámleketlik universiteti Yurisprudenciya tálim baǵdarı 1-kurs studenti Tursınbaev Sadenbay Quralbay ulı.
Esletip ótemiz, Berdaq atındaǵı Qaraqalpaq mámleketlik universiteti tárepinen olimpiadanıń 1-orın iyesi ushın 3 000 000 sum, 2-orın iyeleri 2 000 000 sum hám 3-orın iyeleri 1 000 000 sum xoshametleniwi belgilengen.
