Berdaq atındaǵı Qaraqalpaq mámleketlik universiteti jaslar menen islesiw, ruwxıylıq aǵartıwshılıq bólimi baslaması menen universitetimizde bir qatar klub hám dógerekler jumıs alıp barmaqta. Atap aytqanda, jas jurnalistler klubı, jas psixologlar klubı, sport dógerekleri hám «Uni Academy» shet tillerin úyreniw kursları óz iskerligin kórsetip kelmekte.

Búgingi kúnde, bul klub hám dógerekler tek universitet studentleri menen islesip qoymastan jaqın aymaqtaǵı máhálle jasları menen de birge islesiwdi jolǵa qoydı. Usı tiykarda universitettiń jaslar menen islesiw, ruwxıylıq aǵartıwshılıq bólimi hám «Qurılısshı» MPJ jaslar jetekshileri menen birgelikte aymaqtaǵı jaslar ushın seminar-terning shólkemlestirildi.

Onda universitet jaslar menen islesiw, ruwxıylıq aǵartıwshılıq bólimi qánigesi S.Pirniyazov, universitet psixologı G.Reyimbaeva, «Qurılısshı» MPJ jaslar jetekshisi Q.Nietullaevlar qatnastı. Seminarda jaslarǵa universitette jaratılǵan imkaniyatlar, biypul dógerekler haqqında maǵlıwmatlar berilip, birge islesiwdi keńeytiw maqsetinde sóylesiwler alıp barıldı.

Bul klub hám dógereklerdiń tiykarǵı maqseti student-jaslardıń bos waqıtların mazmunlı ótkeriw, olardıń shet tillerin úyreniwge bolǵan qızıǵıwshılıǵın ele de arttırıw bolıp tabıladı.