Xabarıńız bar, usı jıldıń 21-fevral kúni Prezident pármanı menen qabıl etilgen “Ózbekstan – 2030” strategiyasın “Jaslar hám biznesti qollap-quwatlaw jılı”nda ámelge asırıwǵa baylanıslı Mámleketlik baǵdarlamada jaslardıń mashqalaların sheshiw hám potencialın júzege shıǵarıw, olardı talap joqarı bolǵan kásip-ónerge oqıtıw arqalı bántligin támiyinlew boyınsha kóplegen wazıypalar belgilendi.
Belgilengen wazıpalardan kelip shıǵıp, Berdaq atındaǵı Qaraqalpaq mámleketlik universiteti jámááti tárepinen usı jıldıń 18-aprel kúni Nókis qalası «Qarataw» mákan puqaralar jıyınında atalıqqa alınǵan jaslar sonday-aq, mektep pitkeriwshileri menen ushırasıw shólkemlestirildi. Dáslep universitet jámmáti mektep pitkeriwshilerine Qaraqalpaq mámleketlik universitetine studentlerdi qamtıp alıw, bul jerde studentler hám magistrantlardıń oqıp bilim alıw ushın jaratılǵan sharayatlar, studentler tárepinen alıp barılıp atırǵan ilimiy izertlew jumısları boyınsha maǵlıwmatlar berip, ushırasıw qatnasıwshılarınıń qızıqtırǵan sorawlarına juwap berdi.
Bunnan soń, sırtqı miynet migraciyasınan qaytıp kelgen bir qatar jaslar hám olardıń ata-anaları menen sáwbetlesip, olardıń turmısında ushırasıp atırǵan mashqalaları tıńlandı hám mashqalalardıń sheshimi boyınsha wazıypalar belgilep alındı.
