Jaslar arasında diniy ekstremizm, jınayatshılıqtıń aldın alıw hám de olardıń bos waqıtların mazmunlı shólkemlestiriw maqsetinde usı jıldıń 18-aprel kúni Berdaq atındaǵı Qaraqalpaq mámleketlik universiteti student-jasları arasında sporttıń «Street workout» túri boyınsha jarıs ótkerildi. Jarısqa universitet studentlerinen ibarat 13 komanda (er balalar) qatnastı. Jarıs qızǵın bellesiwlerge bay bolıp, jaslardıń Street Workout sport túrine bolǵan qızıǵıwshılıǵı, olardıń sport (jarıs shártleri: (30 sekund ishinde) turnikke tartılıw, (30 sekund ishinde) brusyada qollardı búgip jazdırıw, (30 sekund ishinde) otırıp turıw, (30 sekund ishinde) jerde tayanıp jatıp, qollardı búgip jazdırıw) sheberlikleri sınaldı.
Jarısqa tájiriybeli sportshılar, dene mádeniyatı teoriyası hám metodikası kafedrası oqıtıwshıları N.Akimov, A.Qazaqbaev, S.Eliusinov, U.Yuldashovlar tóreshilik etti. Jarıs tóreshiler tárepinen ádil bahalanıp, I-orındı Shımbay fakulteti, II-orındı Dene mádeniyatı fakultetiniń kurash tálim baǵdarı 3-kurs studentleri, III-orındı sırtqı bólim studentleri jeńip alıwǵa miyasar boldı.
Jarıs jeńimpazları shólkemlestiriwshiler tárepinen tayarlanǵan diplom hám estelik sawǵaları menen sıylıqlandı.
Ótkerilgen jarıstıń tiykarǵı maqseti studentler arasında sporttıń Street Workout túri boyınsha jarıs ótkeriw arqalı student-jaslar arasında salamat turmıs tárizin qáliplestiriw, universitet kóleminde bul sport túrin rawajlandırıw hám en jaydırıw, olardıń sport sheberligin asırıw, qábiletli sportshı studentlerdi anıqlaw bolıp tabıladı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
