Berdaq atındaǵı Qaraqalpaq mámleketlik universiteti Geografiya hám tábiyiy resurslar fakultetinde 22-aprel jer kúni múnásibeti menen ushırasıw bolıp ótti. Ushrasıwdı fakultet dekanı N.Embergenov hám Geodeziya, kartografiya hám tábiyiy resurslar kafedrası baslıǵı Ya.Xudaybergenov, stajyor oqıtıwshı A.Primbetovlar alıp bardı hám kelgen miymanlardı tanıstırıp ótti. Bunnan soń, Mámleketlik kadastrlar palatası Qaraqalpaqstan Respublikası basqarması baslıǵı S.Urunbaev sózge shıǵıp, student jaslardı 22-aprel « Jer kúni » menen qutlıqladı hám tarawdaǵı sońǵı jańalıqlar menen tanıstırıp, kadastr tarawınıń qıyınshılıqları hám jaslarǵa olardıń óz karerasın qalay baslaw kerekligi haqqında pikirleri menen bólisti.

Sonday-aq, ushırasıwda N.Atamuratov Kadastr agentligi direktorı másláhátshisi shıǵıp sóylep Respublika boyınsha Kadastr tarawındaǵı jańa joybarlar, jer múnásibetinde xalıqaralıq tájriybe almasıwları, búgingi kúnde Ózbekstan Respublikasınıń jer qatnasıqlarında tutqan ornı haqqında keń pikirlerin studentler menen bólisti.

Ushırasıw student-jaslardıń qızıqtırǵan sorawları menen dawam etip hám ózlerine kerekli bolǵan maǵlıwmatlardı aldı, bunnan soń Mámleketlik Kadastrlar palatası basqarması qánigesi M.Kudenov tarawǵa jańadan alıp kelingen úskeneler menen tanıstırıp onıń imkaniyatların student-jaslarǵa túsindirip ótti.