Mámleketimizde bilimlendiriw tarawında, atap aytqanda, mekteplerimizdi búgingi kún talapları tiykarında shólkemlestiriwde túpkilikli ózgerisler ámelge asırılmaqta. Bul processke joqarı bilimlendiriw mákemeleriniń de biriktirilip atırǵanı biykarǵa emes. Sebebi hár eki bilimlendiriw shólkemi de bir-biri menen tıǵız baylanıslı bolıp, bir-birin tolıqtıradı hám rawajlandıradı.

Usı tiykarda Berdaq atındaǵı Qaraqalpaq mámleketlik universiteti, Biologiya fakulteti dekanı Ya.Ametov basshılıǵında fakultet professor-oqıtıwshıları Nókis qalası 1-sanlı qánigelestirilgen mektep-internatında bolıp, mektep-internat jámááti menen ushırastı. Ushırasıw barısında bul mektepte oqıtılatuǵın anıq hám tábiyiy pánler, olarǵa ajıratılǵan saatlar, sabaqlardıń ótiliw barısı, mektep-internatta oqıwshılar ushın jaratılǵan shárayatlar, kompyuter xanaları, laboratoriya xanaları, asxana hám oqıwshılar turar jayları menen tanıstı. Bunnan soń, orınlarda mektep-internat hám universitet professor-oqıtıwshılarınan ibarat isshi topar dúzilip, óz-ara tıǵız baylanıslar jolǵa qoyılatuǵınlıǵı,  atap aytqanda; universitette oqıtılatuǵın bakalavriat tálim baǵdarları (matematika, fizika, ximiya, biologiya hám shet tili) student-jasları menen hár qıylı sabaq hám sabaqtan tıs is-ilajlar alıp barıw, pitkeriwshi klass oqıwshıları ushın ashıq esikler kúnlerin shólkemlestiriw, sonday-aq  professor-oqıtıwshılar menen birgelikte sabaqlıq hám oqıw qollanbalar jaratıw, birgelikte ilimiy maqalalar jazıw, joqarı klasslardıń laboratoriyalıq sabaqların universitet laboratoriyalarında tájiriybe sınaǵın ótiw sıyaqlı bir qansha jumıslar kelisip alındı.  Ushırasıw barısında universitet jámáátinen barǵan wákiller ziyrek oqıwshılar menen de ushırasıp, sáwbet barısında jaslardıń sapalı bilim alıwı ushın mámleketimiz tárepinen hám universitette jaratılǵan shárayatlar haqqında da aytıp ótti.

Biologiya fakulteti “Ekologiya hám topıraqtanıw”

kafedrası assistenti    Aygerim Naǵashıbayeva