Búgingi kúnde mámleketimizde suwǵarılatuǵın jerlerdiń meliorativ jaǵdayın jaqsılaw, suw resurslarınan aqılǵa muwapıq paydalanıw barısında keń kólemli jumıslar ámelge asırılmaqta. Usınday iygilikli islerdiń biri Biologiya fakultetinde de baslap jiberildi.
Aprel ayı baslarında “Ekologiya hám topıraqtanıw” kafedrası baslıǵı M.Allamuratov hám kafedra professor-oqıtıwshıları tárepinen fakultet aymaǵın kókelemzarlastırıwda ónimdar topıraq tayarlaw maqsetinde biogumus tayarlaw jolǵa qoyıldı. Tayarlanǵan orınlarǵa Kaliforniya qızıl jawın qurtı qoyıp jiberildi.
Bul alıp barılıp atırǵan jumısalr negizinde dáslebinde tájiriybe retinde fakultet átirapı jerleri ushın gumuslı topıraqlar tayarlanıp, soń ilimiy jumıs dárejesine alıp shıǵıw, aldaǵı waqıtları universitet átirapındaǵı jerlerdi biogumus penen támiyinlep, hátteki isbilermenlik dárejesine alıp shıǵıw kózde tutılmaqta.
Sonday-aq, bul maydanshada belsendi studentler qatarına kiriwshi studentlerimiz miynet etip, ózlerine bekitilgen ustazları menen birgelikte, ózleriniń bakalavriat pitkeriw qánigelik jumısları ushın materiallar toplaw imkanıyatına da iye boladı.
