Aldın xabar bergenimizdey búgin 24-aprel kúni Berdaq atındaǵı Qaraqalpaq mámleketlik universitetinde «Ózbekstan – ulıwma úyimiz», atamasında festival bolıp ótti. Onda Qaraqalpaqstan Respublikası Joqarǵı Keńesiniń komitet baslıǵı T.Romanov, Qaraqalpaqstan jazıwshılar awqamı baslıǵı K.Karimov, Qaraqalpaqstan musılmanlar qazıyatı qazı orınbasarı A.Jolawshiev, Xalıq deputatları Nókis qalalıq Keńesiniń deputatı A.Saypova, sonday-aq, universitettiń professor-oqıtıwshıları, student-jaslar qatnastı. Dáslep miymanlar studentler tárepinen islengen milliy kiyimler, qol óneri úlgileri, súwretler kórgizbelerin tamashaladı.
Bunnan soń, «Ózbekstan – ulıwma úyimiz», «Milletler aralıq doslıq, keńpeyillik – Ózbekstan rawajlanıwınıń tiykarı» atamasında ilaj baslandı. Ilajdı Berdaq atındaǵı Qaraqalpaq mámleketlik universiteti rektorı A.Reymov ashıp berdi. Ol óz shıǵıp sóylewinde mámleketimizde milletler aralıq hám diniy keńpeyillik tarawında iygilikli maqsetler hám ideyalar ilgeri súrilip, bul baǵdarda unamlı jumıslar ámelge asırılıp kiyatırǵanlıǵın ayrıqsha atap ótti.
Ilajda sózge shıqqanlar búgingi kúnde mámleketimizde 130 dan artıq millet wákilleri bir shańaraq perzentlerindey bolıp, teń huquqlı hám óz-ara awızbirshilikte jasap, kiyatırǵanlıǵın, olardıń huqıq hám erkinlikleri, nızamlı máplerin támiyinlew, bilim alıwı, kásip-óner úyreniwi, mádeniyatları, úrip-ádet dástúrlerin saqlaw hám rawajlandırıw ushın mámleketimiz tárepinen barlıq shárayatlar jaratılıp berilgenligin óz shıǵıp sóylewlerinde keltirip ótti.
Haqıyqatında da, Respublikamızda túrli millet wákilleriniń bir shańaraqtıń perzentindey bolıp jasap, awızbirishilikte iygilikli maqsetlerge qaray umtılıwı hár qanday insan qálbine úlken quwanısh bóleydi. Sebebi Ózbekstan Respublikasında milletler aralıq hám diniy keńpeyillik tarawında ámelge asırılıp atırǵan keń kólemli jańalanıwlar jámiyette milletler aralıq tatıwlıq, óz-ara húrmet, mehir-miriwbet, tınıshlıq hám tatıwlıqtı bekkemlew, sociallıq-ruwxıy ortalıqtı támiyinlew, búgingi kúnde xalıqtı razı qılıw ushın elimizde alıp barılıp atırǵan reformalar, unamlı nátiyjesin berip kelmekte. Sonday-aq, milletler aralıq tatıwlıq hám diniy keńpeyillik principlerin qarar taptırıw, milletlerdiń hár tárepleme rawajlanıwı, olardıń milliy qádiryatların saqlap qalıw, úrip-ádet dástúrleri rawajlanıwına mámleketimizde barlıq imkaniyatlar jaratılǵan bolıp, bul óz gezeginde kóp milletli xalqımızdıń milletler aralıq tatıwlıqtı bekkemlew Ana-Watanımızdıń elede gúllep jasnawına xızmet qıladı.
Iláj dawamında universitetimizdiń belsendi student-jaslarınıń koncert baǵdarlaması hám videorolikler jıynalǵanlardıń názerine usınıldı.
QMU baspasóz xızmeti
