Kitap adamnıń ruwxıy dúnyasın bayıtadı, bilimin rawajlandırıp, pikirin ótkirlestiredi. Usı jıldıń 24-aprel kúni Qaraqalpaqstan Respublikası málimleme-kitapxana orayında IV Respublikalıq kitapqumarlıq hápteligi sheńberinde «Kitap meniń ómirimde» atamasında ádebiy keshe bolıp ótti. Kesheni málimleme-kitapxana orayınıń ulıwma oqıw zalı sektor baslıǵı B.Uteniyazova alıp bardı. Keshede Ózbekstan mámleketlik kórkem óner institutı Nókis filialı professorı, Qaraqalpaqstan xalıq baqsısı, «Mehnat shuhrati» ordeni iyesi G.Allambergenova hám usı filialdıń professorı, Qaraqalpaqstan xalıq baqsısı, «Doslıq» ordeni iyesi, Zulfiya atındaǵı mámleketlik sıylıqtıń laureatı G.Axımbetova shıǵıp sóyledi. Olar óz sózinde kitaptıń insan ómirinde tutqan ornı, ózleriniń ilimiy-pedagogikalıq xızmeti dáwirinde kitaplardı oqıw hám izleniw arqalı xalıq arasında abıroy-mártebege eriskenligi haqqında aytıp ótti.

Keshege qatnasqan Berdaq atındaǵı Qaraqalpaq mámleketlik universiteti Tariyx fakultetiniń tariyx hám filosofiya qánigeliginiń 1-kurs studentleri ózleriniń qızıqtırǵan sorawlarına qánigelerden tiyisli juwaplar aldı. Bul ádebiy keshege Tariyx fakultetiniń tyutorları B.Esemuratova hám G.Esboganovalar qatnasıp, kitap haqqında óz pikirlerin bildirip ótti. Keshe sońında Respublikalıq málimleme-kitapxana orayı tárepinen ádebiy kitaplar kórgizbesi shólkemlestirildi. Kitapqa baǵıshlanǵan bul ádebiy keshe kópshilikte tereń tásir qaldırdı.

G.Esboganova,
Berdaq atındaǵı QMU Tariyx fakulteti tyutorı