Búgingi kúnde elimizde 130 dan aslam millet wákilleri tatıw hám awızbirshilikte jasap, miynet etip, úrp-ádet hám dástúrlerine húrmet penen qarap, hár bir milletke tiyisli bayramlardı keń túrde belgilewge ayrıqsha itibar qaratılǵan.

Bunıń ayqın mısalı sıpatında házirgi waqıtta respublikamızda rus, ukrain, qazaq hám túrkmen milliy mádeniy orayları menen bir qatarda koreysler associaciyası jumısı jolǵa qoyılǵan. Kóp milletli xalqımız bir maqset, bir ideya jolında birlesip, elimizdi  rawajlandırıw jolında nátiyjeli miynet etip kelmekte.

Usı tiykarda búgin 25-aprel kúni Berdaq atındaǵı Qaraqalpaq mámleketlik universitetinde «Ózbekstan – ulıwma úyimiz», «Milletler aralıq doslıq, keńpeyillik – Ózbekstan rawajlanıwınıń tiykarı» atamasında doslıq festivalınıń ekinshi kúni bolıp ótti.

Onda Qaraqalpaqstan Respublikası Joqarǵı Keńesiniń komitet baslıǵı T.Romanov, Din isleri boyınsha komitettiń Qaraqalpaqstan Respublikası aymaqlıq basqarmasınıń Nókis qalası bas qánigesi X.Nezamatov, Qaraqalpaqstan Respublikası Ruwxıylıq hám aǵartıwshılıq orayı Nókis qalalıq bólimi baslıǵı Q.Nuratdinov, Nókis qalası bas imam-xatibi A.Nabatov, sonday-aq universitettiń professor-oqıtıwshıları, student-jaslar qatnastı.

Dáslep miymanlar studentler tárepinen islengen milliy kiyimler, qol óneri úlgileri, súwretler kórgizbelerin tamashaladı. Ilajdı Berdaq atındaǵı Qaraqalpaq mámleketlik universiteti jaslar máseleleri hám ruwxıy-aǵartıwshılıq isleri boyınsha prorektor S.Alawatdinov ashıp berdi.

Ol óz shıǵıp sóylewinde mámleketimizde milletler aralıq hám diniy keńpeyillik tarawında iygilikli maqsetler hám ideyalar ilgeri súrilip, bul baǵdarda unamlı jumıslar ámelge asırılıp kiyatırǵanlıǵın ayrıqsha atap ótti.

Ilajda sózge shıqqanlar búgingi kúnde mámleketimizde 130 dan artıq millet wákilleri bir shańaraq perzentlerindey bolıp, teń huquqlı hám óz-ara awızbirshilikte jasap, kiyatırǵanlıǵın, olardıń huqıq hám erkinlikleri, nızamlı máplerin támiyinlew, bilim alıwı, kásip-óner úyreniwi, mádeniyatları, úrip-ádet dástúrlerin saqlaw hám rawajlandırıw ushın mámleketimiz tárepinen barlıq shárayatlar jaratılıp berilgenligin óz shıǵıp sóylewlerinde keltirip ótti.

Iláj dawamında estrada qosıqshıları, universitetimizdiń belsendi student-jaslarınıń koncert baǵdarlaması hám videorolikler jıynalǵanlardıń názerine usınıldı.

QMU baspasóz xızmeti