Usi jildin’ 4-sentyabr ku’ni shet tilleri fakultetinin’ pitkeriwshi kurs studentleri o’zlerinin’ a’meliyat sabaqlarin a’wmetli basladi. Da’slep, olarg’a a’meliy sabaqlari qay ta’rizde alip bariliwi, talap ha’m juwapkershilikleri haqqinda mag’liwmatlar berip o’tildi. Shet tiller fakultetinin’ inglis tili ha’m a’debiyati bag’darindag’i 401, 402 ha’m 409-topar studentleri 17-sanli mektepte, 403, 404, 405, 406, 407 ha’m 408-topar student-jaslari bolsa Qaraqalpaq ma’mleketlik universiteti  akademiyaliq litseyinde o’z a’meliyatin o’teyiwi belgilendi. Ha’r bir studentke ta’jiriybeli metodist-ustaz belgilendi ha’m olar o’zlerinin’ bilimlerin student-jaslar menen bo’listi.

A’meliyattin’ baslang’ish ha’ptesinde studentler sabaqlardi gu’zetip bariw arqali, sabaq o’tiw usillarin, oqiwshilardin’ da’rejesin, qizig’iwshilig’in bilip aliw imka’niyatina iye boldi.

“Da’slepki a’meliyat sabag’in o’tew dawaminda qorqinish ha’m ekileniw bolar edi, lekin oqiwshilardin’ qizig’iwshilig’in, ko’zlerindegi janip turg’an nurdi ko’rip, mende o’z u’stimde ko’p shug’illaniwg’a,  sabaqti ja’ne de qiziqli etip o’tiw ha’m oqiwshilardin’ inglis tilin u’yreniwge bolg’an qizig’iwshilig’in ja’ne de arttiriwg’a hareket etemiz”,-deydi isenim menen a’melyatshi jaslar.

Student-jaslar tek g’ana inglis tilinen sabaq o’tip qalmastan, olarg’a o’z aldina toparlar bekitilgen bo’lip, sol toparlarda ta’rbiya sabaqlarin alip barmaqta.

Solay eken, student-jaslar oqiwshilarg’a bilim beriw menen bir qatarda ta’rbiya beriwdi de u’yrenbekte. Sonin’ menen bir qatarda, a’meliyatshilar tek g’ana o’zleri sabaq o’tip qoymastan, o’zlerinin’ ten’leslerinin’ sabaqlarina kiriw arqali ta’jiriybe almasiwg’a ha’m bir-birinin’ qa’te-kemshilikleri, sonday-aq, jetiskenliklerin bo’lispekte.

G.Konisov,

 Inglis tili ha`m a`debiyati kafedrasinin’ oqitiwshisi.